Мейлан Нежефов
Дявди баяр хурдар, дявди баяр йихьуру – халкьдин айтуйин гьякьлувал гъи кIулиъ гъягъюрайи гьядисйири, гьяйифки, субут апIура. Урусатди Украинайиъ гъабхурайи хусуси метлеб айи дявдин операцияйиъ гизаф баяр талаф шула, гьадму гьисабнаан ихь ватанагьлийирра.
Гъийин йиз макьала Ватан уьбхбан женгнаъ талаф гъахьи Мягьямед Мягьямедовдикан вуйиз. «Табасарандин нурар» газатдин гъарашугъарин терефнаан Мягьямед кечмиш хьувал дерин пашманвалиинди мялум апIбахъди сабси, дугъан хизандиз ва багахьлуйириз башсагълугъвал ккун апIури, узу Мягьямеддин чве Мамед Февраловичдихьна илтIикIнийза. Ич арайиъ гъабхьи сюгьбат исихъ чап апIурача.
– Мамед, увуз гьамусди сюгьбат гъабхуз я вахт, я бедендиъ гьавйир адрубра аьгъязуз. Хъа ихь газатдин дустариз гъит игит машнаан аьгъю ишри. Гьаддиз дугъан уьмрикан учуз ктибтуб увкан ккун апIураза.
– Саризра мициб дерд-хажалат дярябкъри, чве. Гизаф учIвруб ву. Зат мидихъ хъугъуз ккунди адарзуз. Адар кIури гьапIдивахъа!? Учу Февраль ва Фариза Мягьямедоварин хизандиъ ургур велед ача. Гъвандккарин гъулаъ ужуб гьякь-гьюрмат айи баркаллу хизан вуйич. Мягьямед ич хизандиъ хьурпи велед ву. Думу 1986-пи йисан 3-пи февралиъ бабкан гъахьну. Вари гъулан баярси, думура багъри гъулан яйлагъариин аьхю гъахьир ву. Гъулаъ адашдиз ва дадайиз хулан ляхнар-карариз бакар шули, гвачIин-хябяхънан гъадриъ ва гъавриъ ади, ужудар натижйириинди багъри гъулан мектебра ккудубкIуру.
– Мектебдин кьяляхъ жигьилин уьмрин рякъ фициб гъабхьну?
– 2003-пи йисан Мягьячгъалайиъ ДГПУ-йин географический факультетдик урхуз кучIвну, 2008-пи йисан заан хъуркьувалариинди душв ккудубкIну, Хабаровский крайдин Комсомольск шагьриъ армияйин жергйириъ эскервалин буржи тамам апIуз гъягъюру. Армияйиан гъафириз, Урусатдин Яракьлу кьувватариъ эскервалин буржи тамам апIбан рякъ дугъаз уьмриъ къанун гъабхьну. Дугъу учуз, чвйир-чйириз, гьарган кIури шуйи: «Гьациб гъуллугъ а – Ватан уьбхюб». Гьаци думу, 2010-пи йисан контрактдиин къул дизигну, сифте Чечендиъ, хъасин Абхазияйиъ, жвуван хушниинди ктабгъу рякъюъ вафалувалиинди гъуллугъ апIури, лихури гъахьну.
– Хусуси метлеб айи операцияйиъ Игитрин иштиракваликанра кьюб келима пуб ккун апIураза.
– КIваин апIуз ккундузуз, 2014-15-пи йисари Крымдиъ кIули гъубшу операцияйиъра Мягьямед иштирак гъахьнийи. Думу «Крым азад апIбаз лигну» медалин сагьибра ву. Хъасин, Дагълу Къарабахдин гьядисйириъ иштирак гъахьну. Гьадушваъ дугъаз офицерин званиера тувнийи. Мягьямеддиз СВО-йин аьгьвалат тазаб дайи, думу сабпи йигъланмина спецоперацияйин иштиракчира вуйи. Дугъу ракетйирин дивизиондин командирин вазифйир тамам апIурайи.
Гьаму вазлин 11-пи йигъ тухум-тарайиз кIару йигъ гъабхьнийич… 17-пи июндиъ багъри гъулаз духну, чве чан гьаргандиз вуйи архаин хулаъ сикин гъапIунча. Ич дадайи кIурайиганси, кьадар-кьисматнакан ккудучIвуз шулдар, амма саб ляхин бадали шюкюр ибшри Аллагьдиз – дугъан накьв наан-вуш язиъ гъубхьундар, багъри гъулан ругариин гъабхьну. Гьелбетда, балин, ясана чвуччвун накьвдиин шад даршул. Мидинра чан мяна а. Гъира чипкан саб келимара адарди дудургнайи чвйир цIиб адарихь. Шюкюр ибшри Аллагьдиз.
– Ихь улхуб аьхирихъна гъюри дугъан хизандиканра кидибт, Мамед.
– Гъардаш ву пну кIурайиб дариз. Мягьямед гизаф адмивализ ва чIат-чIурдиз, юлдаш’вализ бегьем кас вуйи. Жара касдин сумчирра, саламра жвуванубси гьисс апIру, аьхюр-бицIир гюзет апIру жумарт кас вуйи. 2014-пи йисан ич гъул’ан вуйи Зумриятдихъди дугъу чан уьмур ккабалгнийи. Милана кIуру риш тербияламиш апIурайи. Гьяйифки, чан шуран гележегдин хъуркьувалариин рази шлу уьмур йиз гъардаш Мягьямеддиз кьисмат гъабхьундар.
