Наргиз Гюлечова

Дагъустан Республикайиъ йимишарна мейвйир ва гьацира йиккун сурсатар уьрхру транспортдинна логистикайин центрар яратмиш апIбан ляхин ккебгъна кIури, Грозный шагьриъ кIули гъубшу Кавказдин инвестицйирин форумдиъ Дагъустандин Глава Сергей Меликовди мялум гъапIнийи.

 

Дугъан гафариинди, юкьубтIан артухъ гьамцдар центрар «Кавказ» федералин трассайин гъваларихъ, янаки районариан гъюрайи рякъяр сатIи шулайи йишварихь дивди. Гъийин йигъаз Мягьячгъалайин багарихь гьациб центр яратмиш апIбан ляхнарра ккергъна. «Думу центрариъ асас вуди республикайин гъулан мяишатдиъ ккадабцIурайи сурсатарин бегьер уьбхиди ва думу тартиб дапIну гьясил апIбан кьяляхъ, мусу тувру йишварра гьадму центрариъ ачмиш апIиди», – хабар тувнийи Сергей Меликовди.

Мидланра гъайри, Дагъустандиъ жа-жаради йимишар ва мейвйир уьрхру йишварра ачмиш апIура. Гьацдар йишварикан саб, кьюд йис улихь Табасаран райондин ТинитI гъулаъра дивну. Душваъ 1 агъзур тоннайин йимишар уьрхюз мумкинвал а. Республикайиъ ачмиш апIурайи йимишар ва мейвйир уьрхру йишварин кьадар йислан-йисаз артухъ шула ва 2030-пи йисаз 80-100 тоннайихьнакьан йимишар ва мейвйир уьрхру йишвар ачмиш апIуз планариъ а.

Магьа гьаму йигъари СтIал Сулейман райондиъра инвестицйирин проектдин дахилнаъди «Полоса» ООО мяишатди, деврин тIалабариз жаваб тувру йимишар уьрхру йишв дивбан ляхнар ккудукIну. Думу мяишатдиъ 50 агъзур тоннайин йимишар уьрхру йишв тикмиш апIура. Гъийин йигъаз дидин сабпи пай, янаки 12 агъзурна 500 тоннатIан артухъ сурсатар уршру йишв тикмиш дапIну ккудубкIна ва августдин вазли думу ляхник кипуз планариъ а.

Къайд апIуб лазим вуки, гьамцдар йишвар ачмиш апIбиинди, жвуван республикайиъ гьясил гъапIу марцци ва ицци тIяъмин сурсат сад йисазкьан тазади, гьаргъян гъюдубтIубси уьбхюз мумкинвал шула.