Мейлан Нежефов
Гьарсаб хизанди чпин велед бицIидарин багъдиз гьаайиз, гьадушваъ лихурайи тербиячйириз ва заведующийдиз лигуру, дина улихьган чпин бицIидар гьаъри гъахьи абйир-бабарихьанра гьерхуб-хъерхуб апIуру. Дицисдар абйир-бабарин му жюрейин кьимат ва фикир узура заан дережайиан бисураза, фицики гъийин заманайиъ бицIидарин багъди набалугъдин уьмриъ аьхю роль уйнамиш апIура. Абара, бабра ляхниъ айиган, дугъан тербияйин шибритI ва гьадлинтина вуйи уьмрин ккиришрар гьадму багъдиъ туву аьгъювалари давамра апIиди.
Хив райондиъ гьациб баркаллу зегьмет зигурайи урчIвуб бицIидарин макандикан саб Асккан Яракк гъулаъ ерлешмиш дубхьнайи «ДеккучIимир» ву. Газатдин гьаму нумрайиз макьала бикIуз дина хялижв гъахьнийза ва багъдин заведующий Гюльгез Рамазановайихъди сюгьбат гъубхнийза.
– Гюльгез Аьбдулгьямидовна, бицIидарин багъдикан улхайиз сифте кьюб келима яв уьмрикан ктибтнийиш ккундийзуз.
– Узу 1986-пи йисан 31-пи мартди Хив райондин Заан Яракк гъулаъ Юсуфоварин аьхю хизандиъ бабкан гъахьунзу. Багъри гъулан 9-пи класс ккудубкIиган, 10-11-пи классар Асккан Яракк гъурхнийза. Мектебдин кьяляхъ 2002-пи йисан Дербент шагьриъ Г.А.Илизаровдин ччвурнахъ хъайи медицинский колледждик урхуз кучIвнийза. 2006-пи йисхъанмина 2012-пи йисазкьан Асккан Яракк гъулаъ ФАП-диъ бицIидарин медсестради гъилихунза. Урхбахъди ва ляхин апIурайи йисарихъди сабси 2009-пи йисан заочно вуди Дагъустандин гъулан мяишатдин академияра ккудубкIнийза.
– Сифте ктабгъу пише духтирвал вуди, хъа гъи бицIидарин багъдиз яв рякъ фици кьисмат гъабхьну?
– Сабди тмунубдиз манигъвал туврадар, дуст. БицIидарин багъдиъ духтирвалин пишекарвал кьадарсуз лазим ву. Йиз уьмрин мяна гьарган бицIидарихъди ляхин апIбаъ ва дурарин гъуллугънаъ духьну ккунибдиъ рябкъюразуз. Думу йиз абйирин ифдиъра а. Ихь райондиъ машгьур мялимар ва аьлимар Айдакьади, Аьгьмадкьади, Аьбдулкьади, Аьбдулгьямид ва Аьбдулрашид Юсуфовар аьгъдру касар гьеле-мегьли алалахъур. ИкибаштIан, дурарихьан гъурубкьу бицIидарихъди ляхин апIбан ирс узура гьисс гъапIунза. Гьамци Асккан Яракк 2013-пи йисан 1-пи феврали абццу бицIидарин багъдиз гъийин йигъазкьан регьбервал тувраза.
– Фициб ву гъи Асккан Яракк гъулаъ бицIидарин багъдин яшайиш?
– Вари гъарашугъарин кьадар гьисабназ гъадабгъиган, коллектив 18 касдикан ибарат вуйич; 46 бицIир ади, кьюб десте ляхник ка. Гьарсар тербиячи тялукь образование айир ву. БицIидарин багъра 21-пи аьсрин вари тIалабарихъди албагну тикмиш дапIнайиб ву. Гизаф рази вуза, маважибдиз дилигди, аьхюр аьхюрси, бицIир бицIирси дидисну аьшкьлуди чпин ляхин апIурайи гъарашугъариин. Гьарсар руководителин аьхю бахт ву албагу коллективдиъ лихуб. Аллагьди узуз гьаму бахтнан лишанра тувна.
Абйир-бабариз дих апIури, гьарсаб машкврахьна аьхю серенжемар гъахуб ва дурар къаршуламиш апIуб ич асас буржйирикан саб ву. Хъа СВО-йиъ иштирак шулайи эскрарин хизанарихьна вуйи лигуб хъана заанди вуйич. Мурар гьаци гафар даруб гъи учхьан мектебдиз гъягъюрайи баяр-шубариин, абйир-бабарси, мялимарра рази вуйивали субут апIура. Дурарихьан алфавитдин вари гьярфар ктухуз, сабдилан йицIубдиина гьисаб апIуз, гьярфар дикIуз, жюрбежюр шиклар зигуз ва слогарихъди урхузра кмиди удукьурайич.
– Гъулаъ яшамиш шулайи абйир-бабарихьна илтIикIну, фу пуз ккундувуз?
– Саб гъапиб, хъугъвал дапIну, чпин уларин нинйир вуйи веледар учухьна гьаърайи абйир-бабариз ва дурар жвувандарси дидисну уьрхюрайи гъарашугъариз аферин пуз ккундузуз.
Кьюб гъапиб, эгер ичв ляхниз манигъвал шулаш ва веледар ккаарцуз гьубкIну вахт адарш, гьаай учухьна, дурариз «ДеккучIимир» ккилибгура.
Гюльгездиз ляхниъ аьхю кьувват багъри хизандира тувра. Дугъу чан уьмрин юлдаш Мирзамягьямеддихъди кьюр риш тербияламиш апIура. Аьхюну риш Заирайи цци мектеб гъизилин медализ ккудубкIну, дугъан Мягьячгъалайиъ медуниверситутдик кучIвуз ниятар а. Хъа кьюрпи риш Амира цци сабпи классдиз гъягъиди.
