Умгьанат Сулейманова
Ватандин, халкьдин хайир бадали зегьмет гъизигу касариз жямяаьтлугъдин терефнаан тялукь кьимат дубхьну ккунду. Гьациб кьиматназ ва гьюрматназ лайикьлу касарикан ву Урусатдин Федерацияйин журналистарин союздин вакил, прозаик Аьбдулмажид Рашидовра.
Улихьнаси, 16-пи июли, дугъаз Табасаран райондин модельный библиотекайиъ гъабхьи «Поэзия террориз къаршуди» серенжемдиъ Дагъустандин писателарин союздин председатель Марина Аьгьмадовайи Урусатдин членвализ кьабул апIбан билет тувнийи.
Дупну ккундуки, Аьбдулмажид Рашидовдин журналистикайин тажрубайин аьхюну пай «Табасарандин нурар» газатдихъди аьлакьалу ву. Мушваъ думу хайлин йисари культурайин ва яшайишдин отделин заведующийди гъилихну. Гьамусяаьт Аьбдулмажид Рашидовди «Табасарандин сес» газатдин кIулин редакторин заместителин вазифйир тамам апIура.
Аьбдулмажид Аьбдулгьямидович Рашидов 1959-пи йисан Табасаран райондин ЧIвурдаф гъулаъ бабкан гъахьну. 1975-пи йисан дугъу Кьюрккарин миржид йисандин мектебдиъ урхуз хъюгъру, 9-10-пи классар Шил’арин кьялан мектебдиъ ккудукIуру.
Мектеб ккудубкIбалан хъяляхъ Аьбдулмажид Рашидов сакьюдар йисари Мягьячгъалайиъ ДАССР-ин телевидениейин ва радиовещаниейин Госкомитетдин табасаран чIалниинди вуйи редакцияйиъ мухбирди гъилихну. 1980-пи йисан думу Москвайиъ М. Горькийин ччвурнахъ хъайи Литературайин институтдиъ заочно вуди урхуз учIвру. Душваъ урхури имиди, жигьили кьюд йисан чан эскервалин буржира тамам апIуру, хъа армияйииан гъафиган, Ставрополь крайдиъ совхоздиъ лихури гъахьну.
1988-пи йисан Аьбдулмажид Рашидов багъри райондиз хъадакну гъюру ва Кьюрккарин кьялан мектебдиъ мялимди лихуз хъюгъру. Мялимвал апIбахъди сабси, думу кIваз ккуни яратмиш апIбан ляхниинра машгъул шулу – «Табасарандин нурар» газатдин редакцияйиъ лихури, чав литературайиъ алдагъурайи гамар мюгькам апIуз хъюгъру. Мугъан сабпи эсерар «Табасарандин нурар» газатдин машариъ 1970-пи йисарин аьхириъ, хъасин «Литературайин Табасаран» альманахдиъ, «Дагъустан дишагьли» журналиъ ва жара газатариъ чап дапIна. Автори 2011-пи йисан кIул’инди вуйи прозайин эсерарин гъварч – «Ккун хьувалихъ хъугъ» китабра чапдиан адабгъну.
Гъи табасаран литературайиъ проза бикIурайидар думукьан гизаф адар. Му рякъюъ дурумлуди гамар алдагъурайидарикан сар Аьбдулмажид Рашидов ву. Гизаф йисари журналистди лихурайивали дугъан бикIбан хатIназ тясир дарапIди имдар. Чан хайлин эсерариъ («Ккун хьувалихъ хъугъ» повестдиъ, «Яшамиш хьуб ужуб ляхин ву», «Мюгьюббат – му гюзгю ву», «КIару дифар улучIву уьмур», «Кьисмат», «Аьламатнан шейъ ву арагъи» ва ж. ихтилатариъ) писатели гъи жямяаьтлугъдин уьмриъ алахьурайи камивалар, нукьсанар танкьид апIура. Автор чан ихтилатариъ, повестариъ гизаф гьядисйир улупуз, урхурайириз насигьятар тувуз чалишмиш шулдар, аьксина, дугъу урхруриз эсерин гьякьнаан жвуван фикир дюзмиш апIуз мумкинвал тувру.
А. Рашидовдин хусуси метлеб айи дявдин операцияйин иштиракчйирикан повесть бикIуз ният а. Жара эсерарин зиинра лихура.
Аьбдулмажид Рашидов Уру-сатдин писателарин союздиз кьабул апIбахъди тебрик апIури, «Табасарандин нурар» газатдин коллективди дугъаз яратмиш’валин рякъюъ цIийи хъуркьувалар ккун апIура.
