Мейлан Нежефов

Гуж гъабшиш, юртран ккумра жилиз гъябгъюру, кIур. Магьа, Хив райондин Зилдикк гъулан жямяаьтдин гуж дубхьну, гизаф вахтна улихь учIруди дийибгънайи штун месэла гьял апIуз удукьну.

 

Гъулан кьялаъ айи штун кIулиин рас апIбан ляхнар духну ккунди, швнуд-сад йис вуйи, амма жюрбежюр дюшюшари ляхин улихь гъабхуз гъидритри гъахьну. Аьхир, уч дапIнайи 158 агъзур манат пул харж дапIну, гъулан жямяаьтди саб гьяфтайин арайиъ цалар ва латар рас гъапIну ва, катIри, кIан’ан кIулиз плита гъивну. Гьамус латарин улихь жархарра ккахьбанди ву. Устйирихьна ишлетмишназ лазим вуйи вари материалра тувна. Бегьем дархьи кепкер гъулан главайи чан терефнаанра иливну, ляхин тамам дапIну ккудубкIура.

«Шид варибдин кIул ва бина ву. Му штун кIул имид-амдар гъулахъди сабси арайиз дуфнайиб ву. 50 йистIан артухъ вахтна булагъдик саб тахсирра ктайи. Анжагъ аьхиримжи йисари бицIи нукьсанвалар арайиз гъафнийи. Гъулаъ уставал кайи касар гизафдар ади гъахьну. Дурарикан сар му штун кIул мюгькамди ккабалгур, рукьан, гакIвлин ва гъвандин уста, шаирвалин хатIра кайи Заки Дашдемиров вуйи. Штун гъайгъушнаъ гъахьи касдиз женнет а кIур. Женнетдин нивкI’ан хътрергри чав. Гъи гьарурин хулаъ шид ашра, мал-къарайизси, гъирагъдилан гъулаз хялижв гъахьи касдизра гъулаъ штун кIул чарасуз лазим ву. Магьа жямяаьтдин гафра, ляхинра саб гъабхьиган, ляхин улихь гъабхуз юкIв гъюру. Гьамусди уставалин вари ляхнар тамам апIурайи Павликдиз, дугъан кюмекчи Зиямдиз ва Фариддиз гъуландарин терефнаан аферин кIураза. Гьаму йигъари гъулаъ алакIнайи тукарин йирси шалмнар ва симар гьюдюхбан гъаразнаъра ача. Гьавйир чвлихъна илтIикIайиз, думу ляхинра кIули адабгъидича», – къайд апIура гъулаз регьбервал туврайи Аьбдулгьяким Гьюсейбеговди.