Гъи, 21-пи аьсриъ, жвуван хал-хизанра дюбхну, веледар тербияламиш ва эвленмиш дапIну, гъирагъдизди касибвал кайирихьинди лигуз, дугъаз кюмекнан хил гьачIабккуз, гьелбетда, вардихьан даршул.
Гъийин макьалайиъ узуз, чпик гьациб кьувват кади, гъул-хал бадали мухриъ юкIв убгурайи касарикан пуз ккундузуз. Улихьна йигъари йиз гъунши ругариин ерлешмиш дубхьнайи Зилдиккна адахънийзу. Узуз гъябкъю ляхнихъ сифте хъугъузра гъабхьундайзухьан. Вари жямяаьтди Имирчубан Чубановдин хянккан чIанади хюйир гъахурайи. Дугъриданра, гьавайиди. Му касарин багахьна душну, гьерхуб-хъерхуб гъапIнийза.
– Гьюрматлу вуйи зилдккарин жямяаьт, му фициб йикьрарниинди вуйи ляхин ву?
Уч духьнайидарин арайиъ айи Гъизил Астархановайи, Гюльфизар Чубановайи ва Сефият Сяидялиевайи гьамциб жаваб тувнийзуз: «Ич гъул`ан Дербент шагьриз удучIвну душнайи Январ Чубановди гьамци гьар хизандин кIулихъ шишал хю, кIекIел шекер, псюк шекер, семечкин ччим, макаронар, дюгю, чIихир туври, магьа гьамус шубуд кIуру йис ву. Учу шубридра фабрикайиъ халачийихъ хъайидар вуча. Му кеспи дарапIиш, саб артухъ кепек жара йи-швлан гъюрадарчуз. Январ халуйи дапIнайи му ужувлан ляхин учуз саб хайлин кюмек ву. Гъит, кIваин алдру балайиккан Аллагьди уьрхри чав. Гъазанмиш апIру жандиз сагъ`вал тувричан, илдипнайи садакьа чан хизан-кюлфетдин улихь дугъубжвричан».
Уч духьнайидари варидари, му гафарик ктикьури, Январ Чубановдиз ва хъана чпин гъулаз гьар йисан мицисдар кюмекар туврайи агьалйириз чухсагъул мялум апIурайи. Думу мерд касарин арайиъ Муфрудин Юсуфовдин, Эседуллагь Абачевдин, Мягьямед Навалиевдин, Назир Аьшурбеговдин ччвурар гъидиснийи.
Мягьямед Навалиевдира, Январ Чубановдиси, чан терефнаан гьар йисан хизандин кIулихъ гъуландариз кюмекар апIури, швнуд-сад йис ву.
Эседуллагь Абачевди военный ляхниъ учIвуз гъул`ан вуйи саб жерге жигьилариз кюмекар тувну. Назир Аьшурбеговди саб хайлин жигьилариз студентар хьуз, урхуз кюмек гъапIну. Муфрудин Юсуфовди гъуландариз сумчир-саламдиз ишлетмиш апIру мянфяаьтлу стулар, кусрийир гьязур дапIну тувну. Дурар хайир-шейирназ, герекшназ Мажвгул, ЧIира, Яракк гъуларизра гъахури шулу.
Гъит, гьар гъулаз, гъул`ан удучIвну душнайи агьалйириз, мумкинвал айидариз, удукьрудариз, мицисдар ужувлан ляхнарин тереф дибисну, гъуландариз кюмек тувуз амур апIри чпиз.
