Мейлан Нежефов

Вари дюн’яйиъ августдин сабпи гьяфтайиъ светофорин йигъ къайд апIура. Сабпи ражар вуди светофор 1914-пи йисан 5-пи августди CША-йиъ Кливленд кIуру шагьриъ ишлетмиш апIуз хъюгъну. Му йигъ къайд апIури, цци 110 йис ву.

Гьелбетда, светофорин рангар варидариз мялум вухьуз. Дидкан вуйи мялуматар, ачухъ дарсар ва жюрбежюр серенжемар баяр-шубариз гьам бицIидарин багъариъ, гьамсана мектебариъ ва коллежариъ гъахура. Амма, йигъ-йишв хатIасузвал уьбхбакан ухьу улхурашра, Дагъустандиъ аварйирин кьадар зат кам шуладар. Ихь гьялаквалиан, сариз сар саб дакьикьайин арайиъкьан ккюдрюгърайивалиан сан-гьисаб адрубкьан хатIйир шула. Гьялаки нир гьюлиз хъубкьундар, кIуруганси, гьяфтайин арайиъ рякъюъ гъягъбан къайдйир дюрюрхрайивалиан швнур-сар касдин уьмрар кьатI шула, хайлиндар бедендин сагъламвалихъ мягьрум шули, тувнайи саб жикъи уьмриъ сакьат шула. Сар-сарилан ултIуччвуз, чан машиндин жвар тмунуриз улупуз кьаст айивалиан светофорин рангаркьан, кивнайи камерарикьан рякъюри шулдархьуз. Хъа аьраба алдабкган, гафарна багьнийир гизаф дихъуру, кIуруганси, саб дюшюш гъабхьиган, жвувлан тахсрар алдаури шулухьа. «Гъюз ккайибдихьан гьергуз даршул, Аллагьди гьаци дугъаз дибикIна» кIурухьа. Ав, му гафарра гьякьлудар ву. Хъа вушра, гьарури чакан, жвуван хизандикан багахьлуйирикан фикир дапIну, улупнайи йишвахь рякълан улдучIвури, светофор ва рякъярихъди керхнайи ва урснайи ишаратар гюзет апIури гъахьиш, хъугъай, валлагь, рякъяриъ шулайи къулайсузваларин ва хатIйирин кьадар фукьан вушра цIиб апIуз шулу. Сабурлувал, адмивал ва саламатвал гьарсарин улдукьу дустар ишри!