Гюлягьмад Маллялиев,
Гюльнара Мягьямедова
29-пи августди Табасаран райондин Ургур чвуччвун ва сар чуччун гъалайиина Кьибла Дагъустандин 14 районариан ва шагьрариан, жямяаьтлугъдин арайиъ заан гьюрмат айи, уьмрин баркаллу рякъ ккадапIу, гизаф веледар дюн’яйиина гъахи ва дурариз ужуб тербия туву хизанар уч гъахьнийи. Гъала, дидин яркьуди машгьур дубхьнайи тарих хизандин варитIан гирами лишнихъди – вафалувалихъди – аьлакьалу ву, ва мушв’ин йицIдар йисариинди албагну, чиб-чпиз вафалуди яшамиш шулайи хизанарин кIулар лишанлу апIбан ният лап фагьумлуб ва хайирлуб вуди гьисаб апIурача.
«Дагъустандин хизан» ччвур тувнайи му аьхю серенжем республикайин зегьметнан ва жямяаьтлугъдин артмиш’валин, культурайин министерствйири Табасаран райондин администрацияйихъди сатIиди тешкил гъапIуб вуйи. Думу, цци уьлкейиъ къайд апIурайи Хизандин йисан дахилнаъди республикайин кIулиъ айи Сергей Меликовдин табшуругъниинди гъабхурайиб вуйи.
Гьюрматлу хизанариз бахш дапIнайи му машквраз республикайин правительствойин председатель Аьбдулмуслим Аьбдулмуслимов, саб жерге министрар, Кьибла Дагъустандин муниципалитетарин кIулиъ айидар, ва гьацира Дагъустандин дишагьлийирин союздин ва «Дадйирин кьувват» жямяаьтлугъ тешкилатдин вакилар дуфнайи.
Табасаран райондин терефнаан серенжемдиз хусуси метлеб айи дявдин операцияйиъ жанар фида гъапIу эскрарин ва мобилизацияйин дахилнаъди Донбассдиъ женгариъ айидарин кюлфетариз ва гизаф бицIидар айи хизанариз теклиф дапIнайи.
Гъалайиина дуфнайи хялари, асас мярака ккебгъайиз, СВО-йиъ кечмиш гъахьидарин рюгьяриз бахш вуйи ядигарихъ кюкйир дивнийи.
Хъасин дурар гъалайин улихь албагнайи серенжемдиъ иштирак шулайи муниципалитетарин майднариина гъушнийи ва милли сяняаьтарихъди, палатдихъди, гъаб-гъажагъдихъди таниш гъахьнийи, дагъустан халкьарин хурагар дадмиш гъапIнийи. Гьелбетки, варитIан дадлу, яркьу, гьар жюрейин хурагарихьди, таза йимишарихъди алабцIнайи суфра-майдан Табасаран районди гьязур дапIнайи.
Серенжем ачмиш апIури, республикайин правительствойин кIулиъ айи Аьбдулмуслим Аьбдулмуслимовди уч духьнайи хизанар, хялар, тамашачйир хизандин машкврахъди тебрик гъапIнийи.
«Гизаф бицIидар айи хизан агъзрар йисариинди давам шулайи уьлкейин, Урусатдин тарихдин бина ву», – гъапну уьлкейин Президент Владимир Путинди. Дупну ккундуки, хизандин асас вазифа бицIидар дюн’яйиина хуб, тухум давам апIуб, халкьдин гележег уьбхюб ву. Хизандин му машквар гъабхуз Табасаран район гьаци кьаст’ан кадабгънайиб дар. Табасаран район девлетлу тарих, уткан табиаьт, ужудар аьдатар, хизанариъ варитIан гизаф бицIидар айи, 50 агъзурилан зиина инсанар яшамиш шулайи район ву.
Гъийин машквраз гизаф бицIидар айидарин, бицIидар веледвализ гъадагънайидарин, хусуси метлеб айи дявдин операцияйиъ иштирак шулайидарин, 40 йисантIан артухъ сатIиди яшамиш шулайидарин хизанариз теклиф дапIна. Вари гьаму хизанар сабсдар дар, хъа дурар хизандин кьиматлувал сабпи нубатнаъ айивали сатIи апIура.
Хусуси метлеб айи дявдин операция ккебгъхъанмина Дагъустандиан вуйи 12 касдиз Урусатдин Игит ччвурар тувна, дурарикан 7 кас Кьибла Дагъустандиан ву. Урусатдин Игитар вуйи Эседулла Абачев, Руслан Къурбанов, Исрафил Мягьямедов табасаран халкьдин вакилар ву. Ухьу дурариинди дамагъ апIурахьа ва дурар чешне вуди улупурахьа.
Гъийин машквраз 45 йисантIан артухъ саб хизандиъ сатIиди яшамиш гъахьи Дербент шагьриан вуйи Мавсумоварин ва Жабраиловарин, Дербент райондиан Рамазановарин, Огни шагьриан Мурадхановарин ва Гьясратоварин, Хив райондиан Къалабеговарин, Мягьярамкент райондиан Гьябибоварин ва Тажибоварин, СтIал Сулейман райондиан Аьгьмедоварин ва гьацдар жара хизанариз теклиф дапIна.
Хизандиъ веледарди жарадарин бицIидар гъадагъну, дурариз абайинна бабан манишин туврайидариз кIул’инди чухсагъул пуз ккундузуз. Учу учв’ин гьяйран вуча.
Гъи Дагъустандиъ гизаф бицIидар айи 125 агъзурилан зиина хизанар яшамиш шула, дурарикан 20 агъзур хизантIан артухъ – Кьибла Дагъустандиъ. Гьюкуматди дурариз хайлин кюмекар тувра», – къайд гъапIнийи чан улхбаъ – Аьбдулмуслим Аьбдулмуслимовди.
Машквран аьхириъ кьибла Дагъустандин чешнелу хизанариз гьюкуматдин наградйир ва пешкешар тувнийи. Табасаран райондиан му заан гьюрматназ Шамил ва Шекерханум Аьбдуллаеварин (шиклиъ) хизан лайикь гъахьнийи, хъа Хив райондиан хизандин аьдатар мюгькам апIбаз, бицIидариз ужуб тербия тувбаз Сабир ва Фатмаханум Къалабеговарин хизандиз чузсагъул мялум апIру кагъаз тувнийи.
Официальный пай ккудубкIиган, хизанариз, машквран хялариз ва тамашичйириз Табасаран ва Лезги театрарин артистари, Гьюкуматдин ялхъвнарин «Каспий» ансамбли, республикайин кьибла районарин культурайин управленйири гьязур дапIнайи маракьлу концерт улупнийи.
Гъати женгарин, багъри юрднахьна вуйи убцру ккунивалин ва душмандихьна мичIли даккнивалин, заан мургувалин шагьидар гьахьи къадим гъалайин цалариъ ва дидин аьтрафариъ му йигъан табасаран, лезги, агъул, рутул, дарги халкьарин мяълийирин, ашкьварин мугъамарин, зирек зурнайин, тIарам далдабуйин, назук каманчийин сесер атIагурайи. Дагълу халкьарин уткан ялхъвнари, марцци кIваан гьюрайи мяълийири, мани гьиссарихъди ацIнайи гафари Дагъустандин миллетарин арайиъ айи дуствал, хатир-гьюрмат субут апIурайи. Аьсрариинди гьамци вуйи, гьаци гъубзри хъана варж йисари!
