Мейлан Нежефов

Улихьна йигъари гъулан гъирагъдихъ ерлешмиш дубхьнайи абйирилантина гъубзнайи ва гьамус, учу ибтри, хъана яркьу ва аьхю апIурайи багъдиз йиз аьхюну риш Нурия (шиклиъ) хъади гъушнийза. Ццийин йис Кьалухъ терефназди яр-йимиш, мейвайихъди аванд йис дубхьна. Юкьуб йишвахьинди алтIабццнайи баркаван гьарарикк шурахъди кьючлар ккудукьнийза. Вари гьарарин арайиъ айи хьадан саб вичун гьарик ялгъузди саб швур уьрура дубхьнайи вич кайи. Шуру узкан, кудубтIну, думу чахьна тувуб ккун гъапIнийи. Вич, кудубтIну, дугъахьна тувза. Саб герендилан дугъан хилиъ айи вичуз тамаши гъапIза, амма вич айиси сагъди имийи. Йивури гъанцI, гьаз ипIурадарва, кIури гьерху йиз суалназ дугъан гьамциб жаваб гъабхьнийи: «Хулаз гъушган, дижибкIну, увухъди, дадайихъди ва йиз бицIину чуччухъди ипIидиза, адаш. Учвуз ктарди узуз мидин тIяаьм гъадабгъуз ккундарзуз».

Гьамус сабпи классдиз гъягъюрайи шуран му аьхю фикриин ва дугъу хизандин сабвал гьисс апIурайивалиин кьадарсуз шад гъахьиза. Дугъриданра, хулаз гъафиган, вичун кьисмат гьациб гъабхьнура вуйи.

Дюзди кIуру, хизандиъ аьхюриз лигури, бицIири дубгъуру. Ццийин йис эвелиан хизандин йис вуди улупнайивал гьисабназ гъадабгъну, учу хизандиъ гьарсаб вазлиз хас вуйи мани машкврар къаршуламиш апIури, хизандин сабваликан улхури шулча. Магьа натижайиъ веледари хизандин ччивар кьувватлу апIура. Таза аьмлюхъин гъацIабку тIул дюз алапIуз гьииди шул. Гьаци рягьятди бицидарра дюз рякъюъ ауз ухьуз ягъурлу сяътар ишри, дустар!