Зубайдат Шябанова
2012-пи йисан Урусатдиъ «Земский духтир» программа гьяракатнаъ ипнийи. Дагълу районариъ, духтрар ва фельдшерар гьуркIри адрувализ лигну, думу программа йислан-йисаз давам апIура. Гьаци Дагъустандиъ дагълу гъулариъ, районариъ ва бицIи шагьрариъ 2024-пи йисан «Земский духтир/фельдшер» программайиинди 170 медицинайин гъуллугъчириз йишвар улупна. Думу программайиинди 5 йисаз лихуз гъафи духтрариз саб миллион манат ва фельдшерариз 500 агъзур манат тувру.
Табасаран райондин ЦРБ-йин кIулиъ айи Авсеретдин Мирзабеговди ич сюгьбатнаъ къайд гъапIганси, «Земский духтир» программайиинди райондиз 25 кас гъафну. Дурарикан 20 духтир гъира райондин больницйириъ ва амбулаторйириъ лихура. Авсеретдин Мирзабеговди узу швнур-сар духтрихъди таниш гъапIнийи. Дурарикан сар райондин поликлиникайин участковый духтир-терапевт Казбек Мягьямедов ву.
Казбек Агъабегович Мягьямедов Табасаран райондин Жулжагъ советдик кабхърайи Кьулиф гъул’ан ву. Дугъу 2010-пи йисан Жулжагъ гъулан мектеб ккудубкIбан кьяляхъ, йирхьуд йисан Орел шагьрин гьюкуматдин университетдин дахилнаъ айи медицинский институтдиъ, хъасин, сад йисан, Орловский областдин клинический больницайиъ интернатурайиъ гъурхну.
Дюзди кIуруш, му пишекарвалихъди Казбек бицIи вахтнаанмина багахьди таниш ву. Дугъан адаш Агъабег Керимович Мягьямедов Жулжагъ гъулан духтрарин амбулаторияйин заведующий ву.
«Адашди Дербент шагьриъ медицинайин училище ккудубкIхъанмина гъулан амбулаторияйиъ лихури 30 йис шула. Аьхиримжи йисари адаш гьадму амбулаторияйин заведующий ву. Адашдихьна гъира ляхнин кьяляхъра, йишвнура кюмек ккун апIури, иццрудар хулаз гъюри шулу. Ич хуларикан саб адашди ва дадайи иццрудар кьабул апIру халси ккабалгна. Адаш чан ляхин аьгъю, ужур пишекар ву. Дугъу хайлин инсанариз кюмек гъапIну. Гьаддиз узу бицIи вахтнаанмина адашдин рякъюъди гъягъюз, инсанариз кюмек тувуз, дурар уьзрарихьан сагъ апIуз кьаст гъапIнийза. Мидланра гъайри, йиз кьяляхъ хъайи гъардшарира думу рякъ ктабгъну. Гьаци, кьялану чве Марат Мягьямедов Дербент шагьрин больницайиъ кардиолог-духтир, хъа бицIину чве – Заур Мягьямедов Хючна гъулаъ ЦРБ-йин медицинайин тяди хъубкьру кюмекнан медбратди лихура», – ктибтура Казбек Мягьямедовди.
Жигьил духтри адашдикан, адашдиз гьаммишан кюмек туври варибдин гъавриъ айи дада Фирузайикан, чан коллективдикан ва ляхнин вазифйирикан аьшкьниинди ктибтбиинди дугъан ляхнихьна вуйи гьевес ва дугъриданна инсанарин сагъвалихъан юкIв убгурайивал рябкъюйи.
«Йиз ляхин узуз лап кьабулди вузуз. Мумкинвал ккабхъну имиди, Табасаран райондин ЦРБ-йин кIулин духтир Авсеретдин Исмаилович Мирзабегов кIулиъ ади, духтрарин вари дестейиз кIваантIан баракаллагь пуз ккундузуз. Фицики узу ляхниз гъафи сабпи йигъариланмина дурар йиз сабпи кюмекчйир ва мялимар гъахьну», – кIура Казбек Мягьямедовди.
Казбек Мягьямедов терапевтди лихурайи Хючнан участокдин гьисабнаъ 2690 кас а. Улихьна йисари духтрин кабинетдин раккарихъ аьхю нубатар шуйи. Гьамус электрондин нубатар арайиз гъахиган, вари кагъзар, анализар компьютериз электронный къайдайиинди гъюрайивалиан ляхниз хайлин гъулайвалар духьна. Духтрин гафариинди, сад йигъан 30 касдихьнакьан иццрудар кьабул апIру дюшюшар шулу. Гьацира иццрударихьна, ахниъ айи инвалидарихьна хулариз гъягъюбра дурарин ляхнин вазифйирикан шула.
«Узу мушваъ лихури 7 йис вуйиз. РД-йин сагъламвалин министерствойиан жара гъапIу саб миллион манатдихъ больницайин багахь жил масу гъадабгъунза ва душв’ин хулар дивунза. Йиз гележег узуз райондин ЦРБ-йихъди аьлакьалу апIуз ккундузуз. «Земский духтир» программайиинди райондиз гъюз ккунидариз, юкIв хърарабхри гъюб теклиф дивраза. Му гележег хъайи ляхин, ужуб албагу коллектив, варибдин гъавриъ айи ва кюмекназ гъюру руководство айи йишв ву», – гъапнийи Казбек Мягьямедовди.
