Улихьна йигъари Дагъустандин Огни шагьрин глава Зейдуллагь Гьяшимов ерли дилаварчйирихьна гьар йисандин Послание хьади илтIикIну.
«Гъийин йигъаз «Дагъустандин Огни шагьур» шагьрин округ Дагъустан Республикайин хъайи-хъайиси артмиш шулайи, 1077 гектар жилиин али аьтраф ву.
Шагьрин кIулиъ айидарин улихь инсанариз лихру цIийи йишвар арайиз хувалин, промышленностдин гьясиллувал за апIувалин, бикарарин кьадар цIиб апIувалин, бюджетдиз гъюрайи налогарин кьадар артухъ апIувалин месэлйир дийигъна.
Шагьрин округдин важиб- лу месэлйирикан саб – мюгькам бюджет тямин апIувал, уьмрин читин аьгьвалатнаъ яшайиш ва экономика за апIувал вуди гъубзра. Гьаму месэлйир гьял апIбан бадали, деври, айи мумкинвалариз цIийикIултIан дилигну, гележегдин планар тамам апIбан цIийи рякъяр ктагъувал тIалаб апIура. Шагьрин округдин экономикайиз инвестицйир жалб апIувал – шагьрин администрацияйин улихь дийигънайи важиблу месэйирикан ву.
БицIи ва кьялан дилаварчивал артмиш апIбан бадали, шагьрин аьтрафариин 2019-пи – 2021-пи йисариз вуйи программа тяйин дапIна. 2018-пи йисан 11-пи декабриъ РФ-дин Правительствойин къарарниинди Огни шагьрин округдин аьтрафариин «Дагъустандин Огни» ччвур туванайи яшайишдинна экономикайин улупнайи вахтназ улихьна артмиш апIру аьтраф (ТОСЭР) арайиз дубхна.
«Дагъустандин Огни» ТОР-ин сяргьятар улупна, душваъ инвестицйирин проектар уьмриз кечирмиш апIруган, экономикайин артмиш апIуз ихтияр айи цирк-лар, инвесторари харж дапIну ккуни пулин дакьатарин кьадар ва агьалйир лихру цIийи йишварин кьадар улупна.
Мицисдар мумкинвалари инвесторариз рягьят шартIариинди ляхин апIуз ихтияр тувра. Проектар уьмриз кечирмиш апIурайи касарин (проект уьмриз кечирмиш дапIну ккудубкIайизкьан, амма 10 йисантIан артухъ дарди) гъазанждиин – 0%, хусусиятниин – 0% налог, жилин налог – 0% илибтIна. Дурари бюджетдин дару фондариз пай кивувалин 7,6%-тIан тувдар.
2019-пи йисан Огни шагьриъ инвестицйирин проектар уьмриз кечирмиш апIрударин сиягь гьязур дапIна. Сиягьнаъ чпин проектарра хьади 5 тешкилат а.
Посланиейин метлеб – шагьриъ гъахурайи серенжемарикан инвесторариз мялуматар тувувал ву. 2020-пи йисан инвестицйир жалб апIбан ляхин давам апIидихьа», – дупна «Дагъустандин Огни шагьур» шагьрин округдин глава Зейдуллагь Гьяшимовди чан Посланиейиъ.
