Февралин 1-пи йигълан башламиш дапIну, Урусатдин Пенсийирин фондну туврайи яшайишдин бязи харжариз вуйи пулин кьадар за дапIна.

 

 

Сабпи нубатнаъди, Урусатдин федералин льгота гъадабгъуз ихтияр айи 15 миллион касдиз гьар вазлиъ гъюрайи пул (ЕДВ) 3 процентдиинди за дубхьна. Думу жюре ватандашарин гъатарин арайиъ инвалидар, дявдин женгарин ветеранар, радиацияйин зегьерлуваликк ккахъдар, Советарин Союздин ва Урусатдин Игитар, Социалист Зегьметнан игитар ва гьацдар жарадар а.

Индексацияйин кьадар, 2019-пи йисан пул ужуз хьувалин дережайиз дилигну, тяйин дапIна.

ЕДВ-йин дахилнаъ айи яшайишдин гъуллугъар гьуркIувалра 3% за дубхьна. Къанундиз асас вуди, гъуллугъ гьубкIувалиинди ясана пул гъадабгъбиинди тамам апIуз шлу игьтияжариз туврайи пулин кьадар гьисаб апIуруш, думу 1-пи февралихъан мина гьар вазлиъ 1155,06 манатдиина за дубхьна. Индексацияйин кьяляхъ яшайишдин гъуллугъар гьуркIбан сиягь гьамциб хьибди:

– инвалид бицIидариз дармнариз, медицинайин алатариз ва сагъ’вал за апIру итIру сурсатариз вазлин арайиъ 889,66 манат улупна;
– асас уьзрин профилактикайиз санаторийиз ва курортдиз вуйи путевкайиз гьар вазлиъ 137,63 манат улупна;
– сагъ’вал за апIбан идара айи йишваз рукьан рякъюн транспортдиъди ясана автобусдиъди пулсузди гъягъбаз ва кьяляхъ гъюбаз 127,77 манат тувувал улупна.

Мидланра гъайри, 1-пи февралихъан мина Пенсйирин фондну, ляхниъ адру пенсионер кечмиш гъахьиган, думу накьвдик кивбан бадали тувру пособиейин кьадарра за дапIна. Дидин кьадар февралихъан мина 6124,86 манат ву.

 

Къайд апIувал лазим вуки, аьхиримжи 4 йисандин арайиъ ляхин апIури адру пенсионерарин страховой пенсия инфляцияйин кьадартIан улихьди гъябгъюра. Асас вуди пенсйир пенсияйин гьякьнаан вуйи къанундиъ дигиш’валар тIаъбан кьяляхъ за хьуз хъюгъну. Гьаци вуйиган, 2019-пи йисан 1-пи январилан мина ляхин апIури адру пенсионерарин пенсия 7%, хъа 2020-пи йисан 1-пи январилан мина 6,6%, яна кьялан гьисабниинди 2 агъзур манатдиинди за гъабхьну.