Гьаму йигъари узухьна, чан кIван гьиссар, хабарсузди улубкьу мюгьюббат ачухъ апIури, сар дишагьли илтIикIну. Сюгьбатнан аьхириъ дугъу узкан чаз теклиф апIуб вая насигьят тувуб, ясана йиз фикир ачухъ апIуб ккун гъапIнийи.
Дугъан дюшюшнаъ узу насигьятчира дарза, амма дугъаз йиз аькьвли кьабул апIурайиб гъапнийза.
Узу жара касди узуз ачухъ гъапIу сир варидарин улихьна адабгърудариканра дарза, хъа думу дишагьлийи чав, чан ччвур гьюдюхну, му дюшюшнан гьякьнаан ихь табасаранарихьна илтIикIуб ккун гъапIнийи. Белки, шликIа дугъаз гьякьлу рякъ улупур.
«Йиз 35 йис шулайиз. Гъубшу йисан ич гъунши балиин юкIв улубкьнийиз. Думу Каспийск шагьриан ву.
Уву узхьан, мюгьюббат фици гъафунвухьна кIури, гьерхрава. Гьякьлуди гъапиш, узуз мици яманди фужкIара ккун шул кIури, затра фикир дайиз. Я йишвну нивкI адариз, я уьл ипIуз иштагь шуладариз. Йиз уьмур думу касдикан асиллу гъабхьну. Ич арайиъ ачухъ гъахьи ккунивалин гьиссарикан жарадариз аьгъю шул кIури, йиз багахьлуйири узу нянатлу апIиди, хизан дабгъиди кIури, гучIуразуз. Хизан ккебгъну 15 йис вуйич, кьюр риш ва сар бай ачуз. Ич бай иццру гъахьнийи, ва духтрари думу гьюлин гьавайихьна гъахуз теклиф гъапIнийи. Учу Къизлар шагьриъ яшамиш шулайча. Жилир гьадушваъ чан ляхниъ гъузну, узу веледарихъди Каспийск шагьриз гъафунза. Ич бализ гьиира гъабхьнийи. Сифте вазари жилир уч’ин улуркьуз кми-кмиди гъюри гъахьну. Хъасин, ярхла рякъяр ву, ляхин гизаф а кIури, гьяфтайик сабан, хъасин – вазлик сабан гъюз хъюгъну. Узу, думу тек-бирра дяргъруган, ишури, дугъкан кми-кмиди гъюб ккун апIури, ккарагурира гъахьунза. Амма дугъу йиз дерд гьисабназ гъадабгъури гъахьундар. «Гьамци кьабулди дарш, кьяляхъ Къизлариз гъач», – гъапнийи дугъу. Хъа узу кьяляхъ гъушиган, бай иццру шуйи. Гьаддиз узу Каспийскдиъ гъузуз йикьар гъапIнийча.
Хьадан вазариъ ич гъунши дишагьлийихьна чан бай гъафну. Думу хал-хизан айир дайи. Дюзди гъапиш, дугъан хпир кечмиш гъахьну. Думу жилир вуздиъ дарсар киврайи мялим ву. Учу сатIиди гьар хябяхъган чай убхъури шуйча. Ва мюгьюббат узузра хабар дарди ачмиш гъабхьну. Ич арайиъ мани сюгьбатарилан, зарафатарилан гъайри, фукIара гъабхьундар. Сад йигъан Муслимди, гьаму хябяхъар вари уьмур ккудубкIайиз давам гъахьнийиш, сарун фукIара жараб ккундайзуз, гъапнийи. Амма узу дугъан мани рафтар кьабул гъапIундайза. Дугъу узуз сад йигъандин арайиъ швнуб-саб ражари зенгар апIури, жилирихьан жара хьуб ккун апIура. Амма думу ляхин апIуз шуладарзухьан.
Ав, узуз, дугъриданра, Муслим ккун гъахьунзуз. Рябкъру гьялариан, дугъанра уз’ин юкIв улубкьна. Амма хайлин йисари жили веледдиз ккилигури гъахьи йиз жилир дугъахъ мягьрум апIузра ккундариз. Фикир гъапIиган, жилириз узкан ва веледарикан фикир ктар. Думу, сацIиб вахт дабгну, веледариин улукьузкьан гъюри амдар. Ич балин магьа 5 йис шула.
Узу гьапIруш, аьгъдарзуз. Жилирихьан жара духьну, узуз ккуни касдихъди хизан ккебгъдикIан? Дарш, мюгьюббат жин дапIну, кIваълан гьархну, узу ва хизан даккни жилирихъди гъуздикIан? Хъа мици фукьан вахтна яшамиш хьиди? Жилирин жара дишагьли а кIури, гъеебхьунзуз. ЦIиб вахтналан узу я хизан дарди, я йиз юкIв улубкьнайи кас дарди гъузбахьанра гучIуразуз»,
– гъапну Альбинайи.
Гьякьлуди гъапиш, узу ялгъузди яшамиш шулашра, фу чара дапIнура, хизан уьбхбан терефкар вуза.
Альбинайиз узура чан хизан уьбхбан, жилир вая юкIв улубкьнайи кас бадали ваъ, хъа багъри веледарин бахтлу ва шаду гележег ккабалгури, яшамиш хьпан теклиф тувунза.
Ухди-кьанди жилирра хизандиз гъиди. Веледарра аьхю шула. Дурари адашдихъан ва дадайихъан тербия гъадабгъура, хизандин багьалувал уьбхюз дубгъура, дада шубариз нумуна духьну ккунду. Йиз фикир гьамциб вуйиз, хъа учву, гьюрматлу газат урхурайидар, му дюшюшназ жараси лигуб мумкин ву.
