Мейлан Нежефов

Аьхиримжи йисари Хив райондиъ Мялимарин йигъаз бахш вуди волейболиан талитар кIули гъахура. Гьаци, улихьна йигъари райондин администрацияйин ва профсоюздин пешкешариз тешкил дапIнайи турнир гъабхьнийи. Турнириъ сабпи йишв ГъуштIларин кьялан мектебдин мялимари гъадабгънийи, кьюбпи йишв гъибисдар Ашага-АрхътIарин мектебдин коллектив, хъа лайикьлу шубубпи йишв Ургъ’арин мектебдиз кьисмат гъабхьнийи.

 

Талитарин гьякьнаан чан фикрар ачухъ апIуб ккун апIури, узу ГъуштIларин уьмуми кьялан мектебдиз регьбервал туврайи ва райондин жямяаьтлугъ палатайин председатель вуйи Айдабег Мазовдихьна илтIикIнийза.

«Магьа кIулиъ узу ади аьхю аьшкьниинди талитариъ иштирак шули, йиз мектебдин коллективди гьар йисан пешкешнан йишвар гъазанмиш апIура.
Ав, ич вахтариси дарди, гъи образованиейин цирклиъ лихурайи касарихьна гьякь-гьюрмат амдар. Думуган, кючейиъ мялим гъяркъиган баяр-шубар цаларик кархьуйи, гьергуйи. Нагагь дупну саб машиндиъ алахъиш, мялимдиз дишлади йишв улупуйи. Саб гафниинди, абайихьанси, бабхьанси, мялимдихьанра ул хьайи. Гьяйифки, гъийин жигьилар жарадар ву. Дурариз, чпи интернетди тербияламиш апIурайивализ лигну, вари чпин яшнаъ айидарси рякъюра…

Эгер йисак сабан мялимдиз бахш вуйи машквран йигъариккьан ухьу дугъкан дулулхиш, гьаму жюрейин талитар кIули дурухиш, дугъан зегьметнакан дарпиш, закур кьан хьибди ва мялим гьяспикк гъузидар. Хъа халис мялимдиз чIуру ва жара жвуван баяр айиб дар. Дугъан жумартвалин юкIв гьар вахтна баярихъ убгура; гъи чахь аьгъювалар гъадагъурайи малайикар закур уьмриъ учвтIан саб лик заан хьуб дугъан мурад-метлеб ву. Гьаддиз, гъит ихь закурин насларин арайиъ мялим кIуру ччвурназ гьюрмат гъубзри, дугъан жафайиз кьимат ади, думу кIваълан гьархру агьларикан ихь веледар даришри».