Гюльнара Мягьямедова
3-пи октябрихъанмина республикайиъ илимдин, техникайин, литературайин, публицистикайин, искусствойин ва архитектурайин цирклариъ Дагъустан Республикайин Гьюкуматдин премйириз лайикь вуйи ватандашарин документар кьабул апIура. Дидланра савайи, гьамусяаьт Расул Гьямзатовдин ччвурнахъ вуйи ва СтIал Сулеймандин ччвурнахъ вуйи премйир бадалира документар кьабул апIура. Му шубби премйириз вуйи документар цци 31-пи декабризкьан исихъ улупнайи адресназ хътауз шулу: Мягьячгъала, Лениндин ччвурнахъ хъайи кюче, Дагъустан Республикайин Гьюкуматдин секретарин ляхин тямин апIру идара, телефон: 67-31-28.
Дагъустан Республикайин Гьюкуматдин премйир зиихъ къайд дапIнайи цирклариъ илимдин ахтармишар гъахбан варитIан бажаранлу, цIийи жюрейиинди дибикIнайивалиинди тафавутлу вуйи, жямяаьтлугъдин терефнаан лишанлу дапIнайи, уьлкейин художествойин культурайик лайикьлу пай киву эсерариз, гележегдиъ ватандин илим артмиш апIбаз бахш дапIнайи илимдин зегьметариз, цIийи технологйир ва техника, машинар ва механизмар адагъдариз тувру.
Расул Гьямзатовдин ччвурнахъ вуйи премия, Дагъустандин ва Урусатдин поэзия ва литература артмиш апIбак лайикьлу пай киву машгьур шаирин ччвур аьсрариъ уьбхбан бадали, поэзияйин цирклиъ бажаранлу, варитIан ужудар эсерарин авторариз, хъа СтIал Сулеймандин ччвурнахъ вуйи премия Дагъустан Республикайин гьюкуматдин чIалариинди дидикIнайи прозайин эсерариз, гьацира шиърар ва прозайин эсерар Дагъустандин халкьарин бабан чIалариз таржума гъапIу ужударсдар авторариз тувру.
Дагъустан Республикайин Гьюку-матдин 10 премия кьюд йисак саб ражари туври шулу. Дурарикан табии, жямяаьтлугъ илмарин ва техникайин цирклиан вуйи зегьметназ 4 премия, литературайин цирклиан 2 премия, публицистикайин цирклиан, театрин искусствойин ва кинойин цирклиан, музыкайин искусствойин, концертарин ва мяълийир, ялхъвнар апIбан цирклиан ва шиклар зигбан, накьишаринна прикладной искусствойин, архитектурайин ва тикилишчивалин цирклиан – са-саб премия тувру.
Дагъустандин халкьдин шаирарин ччвурнахъ вуйи премйир Дагъустан Республикайин Главайин багахь хьайи РД-йин Гьюкуматдин илимдин, техникайин, литературайин, публицистикайин, искусствойин ва архитектурайин цирклариан премйир тувру комиссияйи конкурсдин бинайиинди кьюд йисак саб ражари тувру.
РД-йин Гьюкуматдин премйириз, Расул Гьямзатовдин ччвурнахъ вуйи ва СтIал Сулеймандин ччвурнахъ вуйи премйириз лайикь вуйи кандидатар РД-йин министерствйири ва идарйири, яратмиш’валин союзари ва жямяаьтлугъ тешкилатари, илимдин ва урхбан заан заведенйири, зегьметнан коллективари, газатарин ва журналарин редакцийири, чапханйири улупуру. Думу ляхнариз кьимат жямяаьтлугъдин иштираквалиинди ва ачухъди коллегйирин, президиумарин заседанйириъ, правленйирин секретариатариъ, художествойин ва аьлимарин советариъ, зегьметнан коллективариъ тувди. Зиихъ ктуху цирклариан улихьна РД-йин Гьюкуматдин премия гъадабгъу ляхнар кьюбпи ражари премияйиз улупуз шулдар. Сар авториз чан кьюб ляхин РД-йин Гьюкуматдин премияйиз улупуз ихтияр адар. Р. Гьямзатовдин ва СтIал Сулеймандин ччвурнахъ вуйи премйирин конкурсариз авторариз ва таржумачйириз кьюбпи текрар ражари эсерар адагъуз ихтияр адар.
Расул Гьямзатовдин ва СтIал Сулеймандин ччвурнахъ вуйи премйириз лайикь гъахьи авторариз шадлугънан серенжемдиъ лауреатдин диплом ва пулин дакьатар тувру.
Гьаму шубрид премйириз улупнайи авторарин ччвурарра, дурар улупнайи тешкиллатарра кади, комиссияйи кьабул гъапIу ляхнарин сиягь газатариъ чап апIиди. Сиягь чап апIбан кьяляхъ комиссияйин членари, жямяаьтлугъ фикрарра гьисабназ гъадагъури, комиссияйин заседанйириъ лайикьлудар гъядягъюру. Комиссияйи гъядягъю лайикьлу ляхнар яратмиш’валин ва жямяаьтлугъ тешкилатариъ, телевидениейин ва радиойин передачйириъ, газатариъ вари терефарихъан гьял апIуру.
Дагъустан Республикайин Гьюку-матдин премйир, Расул Гьямзатовдин ччвурнахъ вуйи ва СтIал Сулеймандин ччвурнахъ вуйи премйир тувбан гьякьнаан теклифар Дагъустан Республикайин Главайихьна гьял апIуз хътауру.
Дагъустан Республикайин Гьюку-матдин, Расул Гьямзатовдин ччвурнахъ вуйи ва СтIал Сулеймандин ччвурнахъ вуйи премйирин гьякьнаан РД-йин Главайин указар 2025-пи йисан 26-пи июль улубкьайиз удучIвиди.
Дагъустан Республикайин Гьюку-матдин премйир бадали бягьснаъ иштирак хьуз гьязур вуш, думу талитариз фициб ляхин адабгъураш суалар хьади, узу ихь саб жерге ватанагьлийирихьна илтIикIунза.
РД-йин Гьюкуматдин премйир, Расул Гьямзатовдин ччвурнахъ ва СтIал Сулеймандин ччвурнахъ вуйи премйир бадали конкурс мялум дапIнайиваликан гьеле гизафдариз хабар адайи. Хъа гьаддин гьякьнаан чпиз мялумат тувбакан йиз сюгьбатчйир шад гъахьнийи.
«Табасарандин нурар» газат гьаммишан ихь ватанагьлийирин гъуллугънаъ шулу. Гьюкуматдин премйирин гьякьнаан мялумат тувбаз учвуз чухсагъул. Гьелбетда, ухьуз лайикьлу эсерар ахьуз: ккунш поэзияйиан, ккунш драматургияйиан. Кьюд йис улихьна ихь шаир Гюльбика Уьмаровайи Расул Гьямзатовдин ччвунахъ хъайи Гьюкуматдин премия гъадабгънийи. Газатдин каналариъ айи мялумат писателарин дестейиз хътапIунза, гъит, иштирак хьуз ккунидари документар гьязур апIри», – гъапнийи табасаран шаир Эльмира Аьшурбеговайи.
Гьюрматлу вуйи ихь халкьдин вакилар! Конкурсдиъ иштирак хьувал, гьадмура саб бицIи гъалибвал ву. Бажаранлу эсерарин авторар, таржумачйир, аьлимар, конкурсариъ иштирак йихьай. Дабхънайи гъвандиин уртим йивуру, дупна ихь абйирин мисалиъ, фунуб ляхниъра хъуркьувал гъазанмиш апIбан бадали, гьяракат-зегьмет лазим ву. Учвкан, ичв эсерарикан имбударизра аьгъю ибшри. Конкурсдин натижйир йивруган, гъалиб гъахьидарин арайиъ ихь халкьдин вакиларра шул кIури, умуд кивраза.
