Мейлан Нежефов
Ухьуз мялум вуйиганси, Урусатдин Президентдин указдиинди 2024-пи йис ихь уьлкейиъ Хизандин йис вуди гьисаб дапIна. Уьлкейин вари регионариъ хизандин йисаз тялукь вуйи шадвалин серенжемар кIули гъахура. Хъа аьхиримжи йигъинжагъ – «Хизандин йис – 2024» улихьнаси 18-пи октябри Москвайиъ Кремлиъ кIули гъубшну. Душваз Кафари Кавказдиан йирхьуб хизан теклифниинди иштирак хьуз душнайи. Дестейиъ Хив райондин ЦIудухъ гъул’ан вуйи Гьясановарин хизанра айи (шиклиъ). Дурар «Гъулан хизан» кIуру номинацияйиъ иштирак ва гьадму номинацияйиъ гъалибра гъахьнийи.
«Табасарандин нурар» газатдин терефнаан дурарин шадвал пай апIури, узу Гьясановарин хизандин кIулиъ айи Пирмягьямед Гьясановдихьна илтIикIнийза.
«Ич хизан сатIиди яшамиш шули, 34 йис ву. Гьарсаб хизандизси, учузра чвена чиси, ужувланна дерднан йигъар хялижв шула. Хъа хизандин варитIан аьхю бахт гьадрар сабси гьял апIбаъ ва хътIюкъбаъ а. Мидин гьякьнаан йизси, уьмрин юлдаш Гюльмейрамдинра аьхю зегьмет рябкъюразуз. Гьелбетда, ашкарди мидкан пуз начдира дарзуз. Хизандиъ йирхьур велед (шубур байна, шубур риш) айич. Дурар вари тербияламиш дапIну, дурариз зигьим тувну, гъи гьарма чан хизан–кюлфетдин эйсйир ву. Дурарилантина гъийиин йигъаз 14 хтулра ачуз», – гьамци разиди ктибтура хизандикан дидин кIули.
– Пирмягьямед Шихмягьямедович, яв ва уьмрин юлдшин зегьметнан рякъкан йип саб-кьюб гаф.
– Армияйин кьяляхъ узу 1977-пи йисан Омск шагьриъ ерлешмиш дубхьнайи гъулан мяишатдин институтдик урхуз кучIвунза. Урхуб 1983-пи йисан заан хъуркьувалариинди ккудубкIну, гьадму йисан зегьметнан рякъ Омск областдин Усть-Ишимский райондиъ «Новая Заря» колхоздин кIулин экономистдин вазифйир тамам апIбалан ккебгъунза. Багъри гъулаъ яшнаъ айи адашдиз ва дадайиз сарун учу чарасуз герекди айивал гюзет апIури, 1985-пи йисан багъри юрдариз хъадакну гъафича. Гьамушваъра райондин «Хивский» совхоздиъ кIулин экономистди лихуб давам гъапIнийза. Хъасин 19 йисандин арайиъ Пенсионный фонднаъ жюрбежюр гъуллугъарихь гъахьунза. Хъа 2010-пи йисхъанмина гъийин йигъазкьан райондин ЦСОН-дин кIулиъ айирин заместителди ляхин апIураза.
Халис вари табасаран дишагьлийирси, йиз уьмрин юлдашра халачачи ву. Халачачийиз аьхю гьюрмат айи вахтари дугъан устадвализра, зегьметназра райондиан аьхю кьимат айи.
– Ихь улхуб давам апIури, ичв веледариканра кидибт, Пирмягьямед халу.
– Сар риш гьамусяаьт веледарихъди хулаъ а. Тмуну кьюрид шубар Москвайиъ саб аьзарханайиъ лихура. Хъа шубрид баярира гъи, багъри Ватан уьбхбан гъаравлиъ Дагъустандин дагъларин люкьярин зиреквал улупури, чпин жанарилан хил алдабгъну, СВО-йиъ гъуллугъ апIура. Дурари женгариъ улупурайи гьунарар гъи саб мизам терезарихьанра ерцуз даршул.
Гьясановарин, чпи конкурсдиъ гъалиб шул пну, гьич хиял дайи. Хъа мициб намуслу ва баркаллу хизандиз заан кьимат тувуб ихь халкьдин хъуркьувал ву. Аьхю абйир-бабарихьантина гъубзу ватанпервервал гьисс апIурайи хизандин кIулар гъи гьюкуматдин терефнаан, намуслуди ва жюрэтлувалиинди ляхин апIурайивализ лигну, саб хайлин медалариинди, чухсагъул мялум апIбан ва гьюрматнан кагъзариинди лишанлу дапIна. Дурариз гележегдиъра ислягьвалин хъуркьувалар ккун апIураза.
