Советарин кьушмарин аьхиримжи десте Афгъанистандин аьтрафарилан алдау йигъ къайд апIбахъди аьлакьалу вуди, Хив райондин культурайин отделин начальник Казбек Къазиев, культурайин ва жямяаьтлугъ тешкилатарин вакилар 1979-1981-пи йисари Афгъанистандиъ чан эскервалин буржи намуслувалиинди тамам гъапIу Чювекк гъулан агьали, СДК-йин директор Жабраил Сефербеговдиин улуркьну.

 

Душмнарихъди вуйи женгариъ дирбаш’вал улупбаз лигну, Жабраил Аьлибегович СССР-рин Верховный Со-ветдин Президиумдин «Кьягьялвал ва эскервалин дирбаш’вал улупбаз» грамотайиинди, «Интернационалист эскриз Афгъан халкьдихьан гьюрматниинди» медаль ва шагьадатнама тувбиинди, Афгъанистандиъ дявдин женгар ккудукIну 20 йис, 25 йис тамам хьувалихъди аьлакьалу вуди туву медалариинди ва шагьадатнамйириинди лишанлу дапIна.

Культурайин отделин дестейи чахъди гъубху сюгьбатнаъ Жабраил Сефербеговди советарин эскрари Афгъанистандиъ чпин ватанпервервалин буржи фици тамам апIури гъахьнуш, учв иштирак гъахьи гъати йивбарикан ктибтнийи, чахъди гъуллугънаъ гъахьидар, чан командирар кIваин гъапIнийи ва хялариз чухсагъул гъапнийи.

Казбек Къазиевди, культурайин отделин вари коллективдин терефнаан Афгъандин дявдин вари иштиракчйир гьаму йигъахъди тебрик апIури, вари дюн’яйиъ гьарган ислягьвал хьувал ккун гъапIну.