Ватандин Аьхю дявдиъ Гъалибвал гъадабгъну 75 йис тамам шулайивализ бахш вуди, Табасаран райондин Хючна гъулаъ «Ерли жягьтлувалар» проектдин дахилнаъди рягьятвал гъадабгъру Гъалибвалин парк рас апIувал планламиш дапIна. Дидин гьякьнаан муниципалитетдин администрацияйин мялуматарин гъуллугъну хабар тувра.
«Расвалин ляхнар 2019-пи йисан ккергънийи. «Ерли жягьтлувалар» проектдин шартIарин тIалабариинди, думу ляхин уьмриз кечирмиш апIбан бадали, республикайин ва райондин бюджетариан пулин дакьатар жара дапIна. Гьацира проектдин асас тIалабарикан саб – спонсорвалин дакьатар жалб апIувал ву. Уьмуми гьисабариинди, вари 2,2 миллион манат харж апIиди. Спонсор Табасаран райондиан ву, дугъу парк рас апIбан ляхник чанра пай кивуз ккуниваликан ачухъди гъапну», – ктибтнийи райондин глава Мягьямед Къурбановди.
Парк 2 агъзур квадратдин метр жилиин ерлешмиш дубхьна. Райондин кIулиъ айидари асас фикир Ватандин Аьхю дявдин иштиракчйириз дивнайи ядигар цIийи алапIбаз тувра. Табасаран райондиан Ватандин Аьхю дявдин женгариз душну, кьяляхъ дарфидарин сиягь аьлава вуди дюз алапIура.
Гьар йисан апрелин вазлиъ рягьятвал гъадабгъру му паркдиъ Гьюрматнан ва кIваин апIбан Вахта гъабхури шулу. Паркдиъ апIру расвалин вари ляхнар Гъалибвалин Йигъан машквар улубкьайиз ккудукIну ккунду. Паркдиъ йишвну акв тувру алатар артухъси дивди, инсанар лицру жилгъйир цIийи алаиди, инсанар деъру йишвар къайдайиз хиди, бицIидариз тамшир апIру ва спортдин майданра жара апIиди, пулсузди вуйи WI-FI дивди. Саб гафниинди, парк агьалйирин гъуллугънаъ шлуганси ккабалгиди.
