13-пи февралиъ «Дагъустан» РИА-йин конференцйир гъахру майдандиин «Ачухъ гьюкум» проектдин дахилнаъди РД-йин экономикайин ва аьтрафарин артмиш’валин министр Султан Гьяжиев республикайин журналистарихъди гюрюшмиш гъахьну. Министрихъди вуйи серенжем министерствойи 2019-пи йисан гъапIу ляхнарин натижйириз бахш дапIнайиб вуйи.
Конференция ккебгъри, министри къайд гъапIганси, гъубшу йисан асас вуйи улупбариинди, натижйир ужудар ву ва республикайин экономика артмиш апIурайи гьарсаб цирклиъ ужудар хъуркьувалар рякъюра.
«2019-пи йисан яшайишдиз ва гьаммишан ишлетмиш апIурайи инфраструктурайиз кIури, республикайин бюджетдиан деетнайи инвестицйирин кьадар хайлин за гъабхьну. Гъубшу йисандин улупбариинди, тикилишчивалин цирклиз республикайин бюджетдиан саки 7,6 миллиард манат харж гьапIну. Гьаму цирклиъ 2017-пи йисан харж гъапIуб анжагъ 1 миллиардна 180 миллион манат вуйи, хъа гьамус, 2020-пи йисан, 9 миллиарддихьна харж апIуз пландиъ а»,
– гъапну министри.
Конференцияйиъ министри, республикайин экономика артмиш хьпан бадали уьмриз кечирмиш апIурайи проектариканра ктибтнийи. Дугъу мялум гъапIганси, гъубшу йисан «Йиз Дагъустан – Йиз шид» проектдин кюмекниинди республикайин 48 гъулариз шид гъизигну. Гьадму гьисабнаъ Табасаран райондин гъуларра а. Гьацира, республикайин муниципалитетариъ хайлин рякъяр рас гъапIну, шагьрарин гизаф мертебйирин хуларин улихь хьайи гьяятар ккабалгну.
Мидланра гъайри, минис-три ТОСЭР – Каспийск ва ТОСЭР – Дагъ. Огни шагьрариканра ва душвариъ уьмриз кечирмиш апIурайи инвес-тицйирин проектариканра гъапну. Султан Гьяжиевдин гафариинди, гьамусяаьт проектдин дахилнаъди Каспийск шагьрин «Уйташ» инвестицйирин майдандиин шюшйирин ва полиэтилендин шей’ар гьязур апIру кьюб завод тикмиш апIура. Йисандин аьхириз дурари ляхинра апIуз хъюгъди ва душвариъ хайлин лихру йишварра ачмиш апIиди.
Му кьюбиб шагьрариъ дилаварчивал ккебгъуз ккуни касариз гизаф ужудар шартIар гьязур дапIна. Гъубзрайиб – ляхин ккебгъну, думу тамам апIуз хъюгъювалтIан дар.
Конференцияйин аьхириъ, уч духьнайи журналистарин суалариз жавабар туври, министри республикайиз жара дапIнайи федералин грантдикан ва думу харж апIбаканра мялуматар тувнийи. Дугъу къайд гъапIганси, грант фици ва фтиз харж апIуруш, респуб-ликайин Глава Владимир Васильевди агьалйирихьан чпин фикрар ва теклифар ачухъ апIуб ккун гъапIну.
«Му месэлайин гьякьнаан сабпи этапдиъди саки 12 агъзурихьнакьан инсанарихьан теклифар гъафнийи. Асас фикир, икибаштIан, варидари образованиейиз, сагъламвал уьбхбаз ва рякъяриз тувнийи. Республикайин агьалйирси, му месэлайиъ Москвайиан ва имбуну шагьрарианра инсанар иштирак гъахьну. Дуфнайи кьадар теклифариз кьимат тувру комиссияйи 13 цирклиан 48 проект кьюбпи этапдиз гъядягъну. Кьюбпи этапдиъ гъалиб гъахьи проектар грантдин пулин дакьатариинди уьмриз кечирмиш апIиди», – аьлава гъапIну министри.
