Гюльнара Мягьямедова
Июндин вазли «Игитарин вахт» программайин иштиракчйирихъди гюрюшмиш духьну, Урусатдин Президентдихьна илтIикIуз мумкинвал ккабхъиган, майор Денис Диденко кIулиъ ади, ВДВ-йин хусуси метлеб айи ляхнариз лигру гвардияйин 45-пи бригадайин офицерар Херсон областдин ругариин игитвал улупу офицер-разведчик, аьхюну лейтенант Мягьямед Исбакиевдиз «Урусатдин Игит» кIуру ччвур тувуб ккун апIури, Президент Владимир Путиндихьна илтIикIнийи. Исбакиевдин дестейи Херсон областдиъ разведкайин читин месэлйирикан саб тамам апIури, сад йишвандин ва йигъандин арайиъ душмандин бронетехникайин 20 машин дагъитмиш гъапIнийи ва 200-тIан артухъ фашистар гъийихнийи. Мягьямед Исбакиевди, асас десте хатIалу йишв’ан адапIувал тямин апIури, зийнар духьнашра, чан гъуллугънан вазифа аьхиризкьан тамам гъапIну. Думу 2022-пи йисан 15-пи октябри Херсондин багахь гъакIну. Дагъустандин кьягьял Подмосковьейин Мытищийиъ айи военный мемориальный накьваригъ кивна. Дугъан хулаъ хпир ва риш гъузну.
Мягьямед Мягьямедович Исбакиев Якутияйиъ аваржви Мягьямед ва лакшив Марина Исбакиеварин хизандиъ бабкан гъахьну. Адаш полковникдин званиейиъди отставкайиз гъушну, хъа дада ккебгъбан классарин мялим ву. Мягьямеддин 6 йис тамам гъабхьиган, дугъан хизан Москвайиз кюч гъахьну. Душваъ бали спортдин хъуркьуваларра ади, уьмуми образованиейин мектеб ккудубкIну. ЦIиб вахтналан Новосибирскдин военный институтдик урхуз кучIвну. Урхуб ккудубкIбалан кьяляхъ ВДВ-йин разведкайиъ гъилихну.
Мягьямед Исбакиев кьюб ражари Сирияйиз дявдин командировкйириз гъушнийи. Дугъаз Кьягьялвалин орден ва хайлин жара медалар айи. Украинайиъ хусуси метлеб айи дявдин операция ккебгъу йигъланмина дявдин женгарин иштиракчи вуйи.
Мягьямеддин кьисмат кьягьялвалин, намуснан, рюгьнан ижмивалин ва Ватандихьна вуйи ккунивалин ихтилат ву. Офицери, чан хиликк ккайидарин уьмур уьбхбан бадали, чан жан тувуб, дугъриданна, аьхю гьунар ву.
Владимир Путинди офицерарин тIалабнахъ хъпехъбан кьяляхъ къайд гъапIганси, жвувахъди женгнаъ айидари чпихъди гъуллугъ гъабхури гъахьирихъан ккун апIувал заан кьиматнан ва дугъахьна вуйи аьхю гьюрматнан лишан ву. Президентди дурарин тIалаб тамам апIуз гаф тувнийи.
Дагъустандин дирбаш бализ лайикьлу ччвур тувбан гьякьнаан Президент Владимир Путинди улихьна йигъари указдикк къул гъизигну. Мягьямед Исбакиев Украинайиъ хусуси метлеб айи дявдин операция ккебгъхъанмина Дагъустандин вакиларикан Урусатдин Федерацияйин Игит ччвур туву 13-пи дирбаш кас гъахьну .
26-пи ноябри Дагъустандин Глава Сергей Меликов Ватан бадали чан жан туву Урусатдин Игит Мягьямед Исбакиевдин дада Марина Исбакиевайихъди гюрюшмиш гъахьну. Региондин главайи Марина Исбакиева бализ Урусатдин Игит ччвур тувбахъди тебрик гъапIнийи ва ужуб тербия тувбаз чухсагъул гъапнийи.
«Увуз ва Мягьямеддин адашдиз, ичв вари хизандиз чухсагъул. Ичв бай аьсрариинди абйириланмина гъубзнайи шартIариинди аьхю гъахьну. Дугъан вари гъарашугъари, командирари, Сергей Кириенко кIулиъ ади Президентдин администрацияйи игитрин гьунарназ лайикьлу кьимат тувбан бадали, чпиин алиб вари гъапIну. Ихь КIулин командующий дявдин гъуллугънаъ айидариз чав туву гаф гьаммишан тамам апIур ву. Хъа ухьу ихь терефнаан игитариз тербия туву дадйириз пешкеш туврахьа», – къайд гъапIну Сергей Меликовди.
Марина Исбакиевайи чпин хизандиз кюмек туврайивализ дилигну, Сергей Меликовдиз чухсагъул мялум гъапIнийи. «Узу мициб манивал гюзлемиш апIурадайза. Мягьямед гьаммишан инсанариз кюмек апIрур вуйи, гьаддиз думу сарира кIваълан гьаърадар», – гъапнийи Урусатдин Игитрин дадайи.
