Наргиз Гюлечова

Улихьна йигъари Каспийск шагьриъ ерлешмиш дубхьнайи Республикайин образованиейин центриъ предпринимательствойинна финансарин савадлувалин биналу агъювалариан республикайин мектебариъна ссузариъ урхурайи 14 йислан 17 йис’ина яшар вуйи живанарин арайиъ олимпиада кIули гъубшну.

 

Му олимпиада «Кьялан ва бицIи предпринимательство ва хусуси предпринимательствойин жягьтлувалариз кюмек вуди» кIуру Милли проектдин дахилнаъди тешкил гъапIуб ву. Олимпиадайин асас метлеб – аргъаж шулайи жигьилар предпринимательствойин ляхнариина жалб дапIну, дурариз му ляхникан ва финансарин савадлуваликан айи агъювалар ахтармиш апIуб ву. Гьацира му жюрейин олимпиадйир ва жара серенжемар кIули гъахували аргъаж шулайи наслар гьаму ляхнарин гьякьнаан артухъди гъаврикк ккаъра.
РЦО-йиъ кIули гъубшу олимпиадайин натижйир йивбан пайнаъ РД-йин Главайин теклифчи Зарема Мягьмудова, республикайин предпринимателариз кюмек тувру центрин кIулиъ айи Иса Мигитинов ва хъанара жара касарра иштирак духьнайи.

Пуб лазим вуки, эвелиан олимпиадайиъ республикайин мектебариъ урхурайи 3500 баяр-шубар офлайн ва онлайн жюрейиинди иштирак гъахьну. Гьадму кьадарнакан му темайиан ужударсдар аьгъювалар айи 178 баяр-шубар финализ удучIвну, ва дурар 5 командайиз жара гъапIну. Думу командйири олимпиадайин натижйир йивбан серенжемдиз чпин бизнес-проектар хьади дуфнайи.
Гьарсаб командайиз чпин мялимра хъади серемжемдиъ иштирак шули, вахт ккимиди гьязур дапIнайи бизнес-проектдин презентацияйихъди жюрийин вакилар таниш гъапIнийи.
Олимпиадайин жюрийи, дурариз кьиматар дивну, гъалибчйир гъядягъну. Ужударстар проектар улупу командйириз багьалу пешкешарра тувну.