Мейлан Нежефов
«Гьаммишан кIваъ Ватан ва дада айиган, йиз улихь гъаних душмнихьан ихь терефназди я цIакуди лигуз, я ихь ругариинди лик алдабгъуз хьидар», — кIура хусуси метлеб айи дявдин операцияйин иштиракчи, ихь ватанагьли Шамил Гьюсейновди.
Шамил 1998-пи йисан 31-пи авгъустди Хив райондин Хиварин гъулаъ Мягьямед ва Зайнаб Гьюсейноварин хизандиъ бабкан гъахьну. Чпин юкьур велед айи хизандиъ Шамиль шубурпир ву. Багъри гъулан мектебдиъ 9-пи класс ккудубкIбалан кьяляхъ думу 2014-пи йисан Мягьячгъалайиъ юридический колледждик урхуз кучIвру. 2017-пи йисан урхуб ккудубкIу жигьил сад йисандин арайиъ Волгоградский областдин Калач шагьриъ армияйиъ гъуллугъ апIуру.
Эскервалин буржи тамам дапIну гъафи жигьил Москвайиъ шубуд йистIан артухъ вахтна аьхю туканарин гъаравулвалиъ лихури гъахьну.
2022-пи йисан 18-пи январи Шамили Урусатдин оборонайин министерствойихъди контракт гъийибтIнийи.
– Шамил, армияйин кьяляхъ йисар алдахьхъан контракт йибтIуз фти рюгь капIунвук?
– Йиз адаш Мягьямед, дадайин кьюр чве Самрудин ва Мартин Аьлиевар Ватан уьбхбан гъуллугънаъ ади швнуд-сад йис ву. Дурар шубридра жюрбежюр дявйирин ветеранар ву. Узуз дурар гьарган нумуна вуйзуз. Армияйин кьяляхъ контракт дишла бикIуз ккайза. Шубур чуччун кьяляхъ хъайи сар чве вува кIури, дадайин гафар-чIалари гъитундарзухь. Саб гафниинди, дугъан кIвак йивруб дарапIарза кIури, ккебехъну гъузунза. Хъа саб фици-вуш дадайихъди йиз гележегдикан, узу улихь диврайи метлебарикан ктибтуз мюгьлет ккабхъунзуз. Дадайиз йиз гафар деерхьнукьан ккунди адайи, амма, сифте кIулианси дарди, му ражари думу цIиб гъюдли апIуз гъабхьунзухьан (машнак инчI кади ктибтура).
– Контрактдиинди гъуллугъ апIбан кьисмат фициб гъабхьнияв?
– Контракт гъийибтIу гьяфтайиъ Крымдиз командировкайиз гьаънийзу. Мегьел саб ваз бегьем хьайизра, дилин 24-пи февралиъ Украинайизди алдахънийзу. Гьяфтайик, кьюб гьяфтайик сабан багъридарихьан вуйи зенгариан йиз халу Самрудинра гьамушваъ айиб мялум гъабхьнийзуз. Амма сар-сариз учу рякъюз ва алахъуз мюгьлет адар. Гьаци Запорожский областдиъ Мариуполь, Мелитополь шагьрариъ миллетчйирихъди гъахурайи женгариъ халуна хтул иштирак гъахьунча. Кьюридизра гъагъи зийнар духьну, гьамус госпиталариъ сагъламвалин гъайгъушнаъ ача.
– Гьюкуматдин вая духтрарин терефнаан учвухьна вуйи янашмиш’вал фициб ву?
– Духтрарин терефнаан фукьан вушра ужуб лигувал гьисс апIурача, ипIрубдинра саб читинвал кадарчуз. Гьюкуматдин терефнаанра кепкериз, льготариз сабдизра кьан апIуб, нубатназ ккилигуб адар. Вушра саб пуз ккундузуз, бедендин сагъламвалихъ сар касра мягьрум даришри. Валлагьи, сагъламвал адруган, я пулра, я хал-йишвра, улариин иливишра, рябкъюрдар.
– Дявдин майдандиъ айи дустариз фу пуз ккундувуз?
– Чарва гъубккхъантина, алдабхънура ккун. Урусатдин игит Мягьямед Нурбагьандовди гъапиганси, «лихай, чвйир!». Ликриин гъахьибси, узура инсафсузвалар ва аьрвалар хурайи чапхунчйирин диван апIуз учвухьна кюмекназ гъидиза. Ва ачухъди кIураза Ватандихъ юкIв убгру ухьустар кьягьялар жил’ин имбукьан гагьди, дурар ухь’ин гъалиб хьидар.
– Яв ватанпересвалин рюгьназ баракаллагь, Шамил. Яв гележег гьарган аьхю хъуркьувалар айи ислягь майдан ибшри.
