Мейлан Нежефов

Гьаму йигъари Хив райондин Асккан Яракк гъулан администрацияйи тешкил дапIну, хусуси метлеб айи дявдин операцияйиъ жюрэтлувал улупури, жвуван Ватан уьбхбаз чпин уьмур бахш гъапIу кьягьялар фикриъ уьрхюри гьадму операцияйиъ гьунарар улупурайи жигьиларин гьюрматназ бахш дапIнайи волейболин турнир кIули гъубхнийи.

 

Турнирин кьяляхъ узу гъулаз регьбервал туврайи Гьяжириза Кьулиевдикан талитар кIули гъахбан метлебнакан пуб ккун гъапIза.

«Гъулан аьхюр вушра, узуз сариз ккун гъабхьну кIури, гьамци заан дережайиинди тешкил дапIнайи талитар кIули гъахуз удукьурдайи. Гьаддиз гъулан администрацияйин ва агьалйирин терефнаан му ляхниъ кюмек гъахьи Нахим Исмяиловдиз, Амудин Вердиевдиз, Эльхан Сяидмягьямедовдиз ва Мирзабег Багъичевдиз аферин мялум апIураза. Дурар, пулин дакьатаризси, миди вуйи тешкиллувалин ляхнаризра бакар гъахьну.
Талитариъ 6 команда иштирак гъахьнийи. I йишван ва 12 агъзур манат пулин сагьибар Асккан Яракк гъулан агьалйир лайикь гъахьну, II йишв ва 9 агъзур манат гьадму гъулан мектебдиъ урхурайидари гъадабгънийи, хъа III йишваз ва 7 агъзурин манатдиз Заан Яракк гъулан агьалйирин команда гъабхьнийи. Гьацира, талитариъ иштирак гъахьи Хиварин кьялан уьмуми мектебдиъ урхурайдарин, райондин гъулариан жюрбежюр колледжариъ урхурайи студентарин ва СВО-йиан отпускдиз дуфнайи кьягьяларин командйирра пешкешариинди лишанлу гъапIнийхьа.
Турнирин метлеб ихь Ватандин, аргъаж шулайи насларин закурин йигъ акуб хьпак, жил’ина дюзвал ва гъалибвал багахь апIбак чпин хусуси пай киврайи ватанагьлийирин гьюрмат уьбхюб, мидланра савайи, Украинайиъ миллетчйирихъди вуйи женгариъ ич администрацияйин гъулариан жюрэтлувал улупури талаф гъахьи ургур кьягьял фикриъ уьрхюб вуйи.
Ав, Ватандиз жан фида гъапIу кьягьяларин ччвурар ухьу сабвахтнара гьархну ккундар. Насларихьан наслариз гьамцдар ватанпервервалин талитариинди ухьу дурарикан улхуз, ктибтуз ва рубкьуз буржлу вухьа. Хъа жараси хьуз мумкинра дар», – гъапнийи йиз сюгьбатчийи.