Наргиз Гюлечова
ЦIийи йис улубкьруган бицIидариз пешкешар тувбан аьдат, XVIII аьсрихъанмина башламиш дапIну, ккебгънайиб ву. Думу аьдат гъира давам шули ими. Гьяйифки, аьхиримжи йисари Дагъустандиъ саспи касар ЦIийи йисахьна даккнишниинди янашмиш хьуз хъюгъна. Аммаки, ЦIийи йис улубкьурайивалиин рази вуди, бицIидарин кIван мурадар бегьем апIури, машквар къаршуламиш апIурайидарин кьадарра цIиб дар.
Аьхиримжи вахтари йис аьхирихъна гъюри, Дагъустандин Правительство-йиъси, гьарсаб министерствойин, ведомствойин, муниципалитетдин администрацйириъра «КIван метлебар тамам апIру елка» акция кIули гъябгъюра. Думу акция бицIидарин мурад-метлебар гьуркIуз кIури гъабхурайиб ву.
Гьадму акцияйиъ иштирак духьну, «Газпром межрегионгаз Махачкала» ООО-йин генеральный директор Ризван Мурадовдина дугъан заместителари ва газрахъди ляхин апIурайи компанйирин кIулиъ айидари варидари сатIиди 15-тIан артухъ бицIидарин кIван мурадар гьуркIну. Асас вуди кагъзарик кайи бицIидарин тIалабар самокат, батут, жаргъбан тренажер, квадрокоптер, электромобиль, смартфонар, мукьмарин алатар ва шиклар зигбан алатар вуйи. Думу тIалабар вари газовый компанйирин вакилари гьуркIну.
«БицIидарин кIван мурадар варитIан марццидар ву. Гьаддиз дурар бегьем дапIну ккунду. Вари бицIидариз сагъвал, шадвал ва манишин ккун апIураза», – гъапнийи Ризван Мурадовди.
Ризван Мурадов жвуван халкьдин культурайихьна, чIалнахьна ва аьдатарихьна лап гьюрматниинди янашмиш шулайи кас ву. «КIван метлебар тамам апIру елка» акцияйиъ иштирак гъахьиб ктарди, дугъу Каспийск шагьрин 15-пи нумрайин мектебдиъ табасаран чIал агъю апIурайи бицIидаризра чан терефнаан пешкешар тувну.
Мектебдиъ табасаран чIал киврайи мялим – Сейранат Аьбдуллаевайин гафариинди, Ризван Мурадовдихьан вуйи пешкешар анжагъ табасаран бицIидариз ваъ, хъа жарадаризра тувну.
«Табасаран баяр-шубарин жвуван чIалнахьна гьюрмат артухъ апIбиин чалишмиш шулайи касар ихь арайиъ айибдиин узу гизаф шад вуза. Мектебдиъ урхурайи табасаран бицIидарин бабан чIалнахьна вуйи янашмиш’вал артухъ апIуб йиз вазифа вуйиз, хъа вушра, думу ляхниъ гъирагъдиланра кюмек хьуб хуш шлу ляхин ву. Гьаддиз, бицIидари бабан чIалназ артухъди фикир тувуб сесеб вуди, янаки дарсназ аьшкьниинди гъюри кIури, узу Ризван Усмановичдихьна йиз хиликк табасаран чIал дубгъурайи баяр-шубариз ЦIийи йисахъди аьлакьалу вуйи пешкешар тувуз кюмек ккун апIури илтIикIнийза. Дугъу дишлади разивал тувну, чан терефнаан мектебдиъ табасаран чIалнан дарсариз гъюрайи 100-тIан артухъ баяр-шубариз пешкешар гъадагъуз дакьатар жара гъапIнийи.
Пуз ккундузузки, Ризван Усмановичди туву дакьатарихъ гъадагънайи пешкешарикан мектебдиъ урхурайи, сагъламвалин кьит’вал айи ва хусуси метлеб айи дявдин операцияйиъ абйир иштирак шулайи бицIидаризра пешкешар тувунча.
Аьхю чухсагъул кIураза дугъаз, жвуван бицIидарихьна, халкьдихьна, чIалнахьна гьамциб гьюрмат улупбаз. Ризван Мурадовсдар касар ихь арайиъ артухъ ишри. Гьюрмат апIру касарин хил зат ичIи дарибшри», – гъапнийи Сейранат Аьбдуллаевайи.
ИкибаштIан, гъи баяр-шубарин бабан чIалнахьна вуйи ккунивал артухъ апIбан бадали, гьамцдар акцйир кми-кмиди кIули гъахури ккунду. Ихь халкьдин арайиъ фукьан вушра мумкинвалар айи касар. БицIир рази апIуб – лап сувабнан ляхин ву. Гьаддиз, гъачай, гьаму ляхин аьдатнаъ ипурхьа.
