Мейлан Нежефов
Кюре округдин, хъа гьамус Хив райондин ЧIири гъул дегьзаманйирианмина вари элиз машгьур ву. Халис табасаранлуйирин ватанпервервалин рюгь кайи тарихчи Абас-Къули Агъа Бакихановди, инкъилабчи Аллагьверди Акимовди, малдарвалин ва зегьметнан нежбрар вуйи Гуди ва Беглар Бегларовари, бажаранлу мялим, шаир ва жямяаьтлугъ кас Салмахан Римихановди, активист Байрамяли Гьаруновди, рукьан уста Аьбдул Керимовди, малдухтир Гьясрятяли Керимовди, пягьливан Эрзиман Агъабеговди ва гь. ж. гъулан тарих ккабалгбак чпин хусуси пай кивну.
Гъулан баркаллу тарих Украинайин жилариин гъябгъюрайи хусуси метлеб айи дявдин операцияйиъ гьунарар улупурайи, му гъул’ан вуйи 50-тIан артухъ кьягьяларира гъи давам апIура. Гьяйифки, вафалувалиинди Ватандиз гъуллугъ апIбан рякъюъ талаф гъахьи баярра а. Дурарикан кьюр игит – Мизамудин Зульфикьаров ва Нурадин Нурмягьямадов – багъри гъулан ругариин фаракьат дапIна.
Гъийин йиз макьала Хив райондин ЧIири гъуланагьали, аьхюну сержант Артур Ибадуллаевич Аьлиаьгьмадовдикан (шиклиъ) ву. Думу 1988-пи йисан 14-пи майдиъ бабкан гъахьну. Багъри гъулаъ мектеб ккудубкIбахъан, дугъу Дербентдин педагогвалин колледждиъ гъурхну. Сад йисан гъулаъ мялимди дилихну, думу призывдиинди армияйин жергйириз гъушну ва 2008–2009-пи йисари Саратов шагьриъ эскервалин гъуллугънаъ гъахьну. 2010-пи йисан Артур эвленмиш гъахьну, дугъан хизандиъ бай ва риш аьхю шула.
Артур Аьлиаьгьмадов 2010-пи йисан контрактдиинди гъуллугъ апIуз хъюгъну, гьамус думу отделениейин командир духьна. Думу Чечен республикайиъ кIули гъубху КТО-йин иштиракчира ву. 2014-пи йисан Крым кьяляхъ апIбаъ ва Урусатдин Яракьлу кьувватари Сирияйиъ кIули гъубху дявдин операцияйиъ иштирак хьувал лишанламиш апIури, дугъаз тялукь медаларра тувна.
«Му рякъ ктабгъруган, узуз ич Аьлиаьгьмад эм нумуна вуйзуз. Думуган йиз эм капитан вуйи, гьамус подполковник духьна, – кIура Артур Аьлиаьгьмадовди. – Думу вахтари ужуб ляхин абгузра думукьан рягьят дайи».
СВО-йиъ Артур Аьлиаьгьмадовдиз зиян ва контузия гъабхьну. Думу Жуковдин ва Суворовдин медалариинди, «Дявдин жюрэтлувализ» «Эскервалин гъуллугънаъ лишанлу хьпаз», «Эскервалин жюрэтлувализ» ва гьацира жара наградйириинди ва медалариинди лишанлу дапIна.
Чан хъуркьуваларин ва дявдин читинвалариз ккюгъюз удукьурайивалин сир фу вуш гьерхган, Артур Аьлиаьгьмадовди гьамциб жаваб тувнийи: «Инсан саб ляхнихъ хъюгъиган, дугъу думу ужуб ерийиинди кIулиз адабгъуз, чаан удукьрукьан ужуди гьял апIуз чалишмиш духьну ккунду. Эскервалин гъуллугънаъ му жигьатнаан лазим вуйиб, герек гъабхьиган, жвуван ватанпервервал, жюрэтлувал улупуб, улихь диву месэла, сабдизра дилигди, тамам апIуб ву. Эскервалин гъуллугънаъ учIву гьарсариз аьгъяди ккунду: сабан дарш сабан дугъан улихь Ватан бадали дявдин женгнаъ учIвбан месэла дивди, думу мициб ляхниз гьарган гьязурди ккунду. Узура 2010-пи йисан эскервалин гъуллугъ йиз хушниинди ктабгъунза. Ав, йиз багахьлуйирра чпин йиккун парчийин дерднаъ ашул, амма ватан бадали вуйи эскервалин гъуллугъ варитIан заанди гьисаб апIураза».
