Наврузбег Керимов

Улубкьнайи 2025-пи йисан 14-пи январи, РД-йин образованиейин ва илимдин министерствойин буйругъназ асас вуди, Дагъ. Огни шагьрин образованиейин управлениейин гъуллугъниин Хатуна Насурова тяйин гъапIну.

 

Хатуна Нежефовна Насурова 1973-пи йисан 11-пи августди Дербент шагьриъ бабкан гъахьну. Дугъан абйир-бабар Хив райондин Чювек гъул’ан ву. Дербент шагьриъ 19-пи нумрайин мектебдин 8-пи класс ккудубкIну, думу Дербентдин педучилищейик урхуз кучIвру. 1992-пи йисхъанмина дугъу пишекарвалин зегьметнан рякъ чав гъурху 19-пи нумрайин мектебдиъ ккебгъну.

Педучилищейин кьяляхъ 1992-пи йисан мялимвалин заан образование гъадабгъуз Дагъустандин гьюкуматдин педагогвалин институтдин ккергъбан классарин факультетдик заочно урхуз кучIвру ва 1995-пи йисан думу ккудубкIуру.
1997-пи йисан ДГУ-йиъ тарихнан факультетдик кучIвру ва думура 2003-пи йисан ккудубкIуру. Жвувак кайи кеспниин аьшкьлу хьувал инсандин бахт ву. Хатуна Насуровайи заан аьгъювалариинди педучилище ва кьюб заан урхбан заведенйир ккудукIну, намуслувалиинди мялимвалин зегьмет зигури, 32 йисандин рякъ ккадапIну.
1992-пи йисхъан 2000-пи йисазкьан ккергъбан классарин мялимди гъилихну, хъасин 2000-пи йисхъан 2024-пи йисазкьан тарихнан дарсар киври ва аьлава вуди мектебдин директорин урхбан ва тербияламиш апIбан ляхин гъабхурайи заместителдира гъилихну. Ва гьацира 2021-пи йисхъан 2023-пи йисазкьан 19-пи нумрайин мектебдин директорин вазифйирра кIули гъухну.

Гизаф йисари мектебдиъ урхурайи баяр-шубариз аьгъювалар ва тербия туврайи Хатуна Насуровайин зегьмет гьюкуматдин терефнаан лишанлу дарапIди имдар. 2013-пи йисан дугъаз «Урусатдин образованиейин гьюрматлу гъуллугъчи» ччвур тувну. Образованиейин цирклиъ баркаллуди зегьмет зигбаз лигну, дугъаз жямяаьтлугъдин арайиъра аьхю гьюрмат а. Хатуна Насурова 3 веледдин дадара ву. Гьамусяаьт хизандихъди Дербент шагьриъ яшамиш шула.
Хатуна Насурова му жавабдар гъулугъниин дерккувалихъди тебрик апIури, дугъаз заан хъуркьувалар ккун апIурхьа!