Айгуль Мягьямедова
Дагъустандиъ аьхиримжи йисари лайикьлу инсанариз «Дагъустандин халкьдин Игит» награда тувуз хъюгънийи. Ччвур ва награда жямяаьтлугъ тешкилатди республикайин халкьдин улихь лишанлу хьувализ туврайиб вуйи. Гьаму улихьнаси пул гъазанмиш апIуз ккунидари думу награда масу тувуз хъюгъну.
Гьаму аьгьвалатнаъ инсанар гъаврикк ккауб лазим ву: гизафдари «Дагъустандин халкьдин Игит» республикайин заан лишанси гьисаб апIурашра, думу гьюкуматдин награда дар.
Дагъустан Республикайин гьюкуматдин наградйир республикайин улихь лишанлу гъахьи ватандашариз пешкешси тувра, думу наградйирин сиягь а, наградйир тувбан къайда «Дагъустан Республикайин гьюкуматдин наградйирин гьякьнаан» РД-йин къанундиъ улупна.
Хъа йиз улхуб гьюкуматдин наградйирикан дариз. Украинайиъ гъябгъюрайи хусуси метлеб айи дявдин операцияйиъ иштирак шулайи кьушмарин частариан аьхиримжи вахтна РД-йин Главайин адресназ эскрариз «Дагъустандин халкьдин Игит» ччвур тувуб ккун апIури, кагъзар гъюз хъюгъну.
Сергей Меликовди «Дагъустандин халкьдин Игит» кIуру ччвурнан ва наградайин гьякьнаан чан фикрар ачухъ гъапIну. Дугъан гафариинди, награда 80 агъзурилан 300 агъзуриинакьан пулихъ масу туври, кучIлинубдиз илтIибкIна. Дицисдар медалари я кьягьялвал, я машгьурвал улупурадар.
Республикайин Главайи къайд гъапIганси, кучIлин наградйир пай апIурайидариз фуж игит вуш, хъа фуж дарш тяйин апIуз саб жюрейинра ихтияр адар. Дугъу, арайиз дуфнайи аьгьвалат гьисабназ гъадабгъну, Дагъустандин хатIасузвалин Советдин секретарь Мягьямед Баачиловдиз му месэла гьял апIуб табшурмиш дапIна. Чан терефнаан Мягьямед Баачиловди кучIлин наградйирин эйсйирикан Гъалибвалин 80 йис тамам хьпаз бахш вуйи ва жара мяналу серенжемариз гъягъруган, думу медалар кидритIуб ккун гъапIну – Ватан азад апIбан женгариъ лайикьлу наградйир гъадагъу ветеранарин намуснак кядрярхбан бадали.
Йиз фикриинди, Игит кас машгьурвалихъ хъергурдар. Игитар чпи зигурайи зегьметниинди, апIурайи ужувлариинди, рягьимлувалин ляхнариинди тафавутлу шулу.
КIваин апIурхьа агъзрариинди инсанар больницйириъ ахънайи, варжариинди инсанар уьзриан йихурайи, ляхниз дурушди, мистарра кмиди хъяркьну гъахьи COVID-I9 тарабгънайи вахт. Гьадмуган чпин жан гьяйиф дарапIу, йишвнура-йигънура больницйириан удудучIвди ляхин гъапIу, халкь уьзрихьан уьрхюри гъахьи духтрар, кьабидариз, касибвал кайи хизанариз кюмек тувдар — гьадрар ву халкьдин игитар. Хъа дурари чпиз игитвалин медаль ккун гъапIундар, ясана пулихъ гъадабгъундар. Игит инсан медали чав агуру.
