Наргиз Гюлечова
Дагъустан Республикайин аьтрафариин 8713 культурайинна тарихдин ядигарар ал. Гьадрарикан 1953 федеральный, 4442 республикайин, 10 муниципальный мяна айидар ву. Дурарикан 2307 ядигар археологияйин ирснандарик кахьра. Гьамдикан Дагъустан Республикайин культурайинна тарихдин ирснан ядиграр уьрхбан Агентствойи ккудубшу йисан гъапIу ляхнарин натижйириз бахш дапIнайи пресс-конференцияйиъ му идарайин кIулиъ айи Мягьяч Мусаевди мялумат тувнийи.
«Гьамусяаьт учу гьарсаб культурайин объектдин сяргьятар тяйин апIбан ляхин гъабхурача. Гъийин йигъаз 2931 объектдин сяргьятар улупбан кагъзар гьязур дапIна, ва республикайин мяна айи 10 объектдин сяргьятар улупна.
Гьадму ляхнихъди сабси, гьарсаб объектдикан вуйи мялуматар культурайинна тарихдин ирснан сабвуйи гьюкуматдин реестриъ тIаъну ккунду. Вари ляхнар гьамусяаьтна пландиинди гъягъюра.Ккудубшу йисандин арайиъ республикайиъ айи культурайинна тарихдин объектарикан 226 объект реестриъ тIаъну. Гьадрарикан 55 федеральный, 168 региондин ва 3 муниципальный мяна айидар ву», – ктибтнийи Мягьяч Мусаевди.
2024-пи йисан Агентствойи республикайиъ тарихдин мяналу объектарин расвалин ляхнарра кIули гъухну. Рутул райондин Шиназ гъулаъ айи минара, Ахцигь райондин Хрюгъ гъулаъ айи чIвурд ва Дербент шагьриъ Нарын-гъалайин «Орта-Капы» урнар рас гъапIну. Гьамусяаьт Мягьячгъалайин «Дагъустан» гостиница ва Ахцигь гъулан чIвурд рас апIбан ляхнарра давам шула.
Йисандин арайиъ тамам гъапIу ляхнарикан вуйи мялуматар тувбан кьяляхъ Агентствойин кIулиъ айири уч духьнайи журналистарин суаларизра жавабар тувну.
Жвул’арин мистан минарайин ва думу рас апIбан гьякьнаан йиз суалназ дугъу гьамциб жаваб тувнийи:
– Думу объектдин гьякьнаан вуйи месэлайиз фикир тувдича, фицики Жвул’арин минара федеральный реестриъ айиб ву. Гьаддиз, дидин расвалар гъахбан бадали учхьан республикайин бюджетдиан вуйи дакьатар харж апIуз шулдар. Вушра, учу дина душну, минарайин гьялнахъди таниш хьидича ва фицдар уьлчйир кьабул дапIну ккундуш, лигидича.
Дюзди гъапиш, гьаму жаваб Агентствойин вакилари, гъудгнин чIаларси, гьарган текрар апIурайиб ву. Учу 2020-пи йисан чпихьна илтIикIганра, йишв’ина дуфну ахтармиш апIидича гъапнийи. Гьамусра гъюри ими. Белки гьаму ражнукьан дурарин кьуш Жвуллизкьан хъуркьуз гьубкIур.
