Наврузбек Керимов
Украинайиъ хусуси метлеб айи дявдин операция ккебгъхъанмина, ихь аьхю уьлкейин вари пIипIариъ женгариъ айи эскрариз кюмек вуди рягьимлувалин акцйир кIули гъягъюра. Гьелбетда, варидарихьан дявдин женгариъ иштирак хьуз шули адар, хъа шлин гъардаш, шлин бай, шлин худул, шлин адаш, шлин жилир душваъ а. Ватан ва ислягьвал бадали, гъалибвалик умуд кивну, Украинайиъ иштирак шулайи эскрариз жумартвалин кюмек хътапIурайидарин арайиъ депутатар, политикар, меценатар, жюрбежюр тешкилатариъ лихурайи агьалйир, мектебариъ урхурайи баяр-шубар – саб гафниинди, вари халкь а.
Му рягьимлувалин ляхин кIули гъабхури, Гьюкуматдин табасаран драмтеатрин артист Аьгьмад ТIаибовдинра хайлин вахт ву.
ТIаибов Аьгьмад Мягьямедович Табасаран райондин Къужник гъулаъ аьхю хизандиъ бабкан гъахьну. Дурар хьур гъардаш ва кьюр чи ву. Аьгьмаддиг дада Аминат ТIаибовайи чан хьур жили веледар жюрэтлувалиинди тербияламиш гъапIну. ТIаибоварин хизандиан шубур гъардаш СВО-йиъ иштирак шула: аьхюну прапорщик Тимур ТIаибов, аьхюну сержант Гьюсейин ТIаибов, ротайин командир Маллайисин ТIаибов, хъа бицIину гъардаш, Мурад ТIаибов, Москвайиъ кIван уьзрин духтурди лихура. Гъубшу йисан Аминат ТIаибовайиз, дугъан баяри гъуллугъ апIурайи частнан командирихьан Чухсагъулин кагъаз гъафну.
Дупну ккунду, Аьгьмад ТIаибовдин жягьтлувалиинди 2024-пи йисан Донецк ва Луганск халкьарин республикйир Киевдин зулмиккан азад апIбан бадали хусуси метлеб айи дявдин операцияйиъ иштирак шулайи ихь баяриз швнуб-саб ражари кюмекнан гъагъ хъадапIна. Му рягьимлу ва баракаллу ляхникан Аьгьмеди гьамци кIура: «Дюз гъапиш, узуз му ляхникан пуз ккунди адайзуз. Туву садакьа ва кюмек ашкар дапIну ккундар, кIури шулу ихь аьхюдари. Хъа гьяйифки, гъийин девриъ, варидариз мялум вуйиганси, ухьу апIурайи ляхнарикан вари мялуматар сайтариъ ва социалин сетариъ а…
Украинайин ругариин гъягъюрайи женгариъ иштирак шулайи йиз чвйирихъди ва таниш эскрарихъди гьаммишан аьлакьйир уьрхюраза. Дурариз фу лазим вуш, вари хъадапIури, ич терефнаан кюмек туврача. Гьамусди хъадапIурайи кюмек аьхиримжи ражнануб ибшри, хъа ихь баяр вари гъалибвалиинди хулаз кьяляхъ гъюри».
