Зубайдат Шябанова
Гъубшу элгьет йигъан Урусатдин машгьур спортсмен Мягьямад Анкалаев США-йин Лас-Вегас шагьриъ кIули гъубшу UFC-313 турнириъ Бразилияйин спортсмен Алекс Перейрайихъди чемпионвалин чIул бадали кчIихбариз удучIвнийи. Гъалибвал гъадабгъну, думу цIийи чемпион гъахьну. КчIихбарин хьуб лап читин раундарин кьяляхъ вари судйирин саб уьмуми къарариинди – 49:46, 48:47, 48:47 гьисаб ади – гъалиб гъахьи Мягьямад Анкалаев кьялан гъагъ айи спортсменарин арайиъ (93 кг) цIийи чемпион гъахьну.
Мягьямад Анкалаев UFC-йин чемпионвалин чIул гъазанмиш гъапIу Урусатдин хьурпи спортсмен ву. Дугъаз улихьна Олег Тактаров, Хабиб Нурмягьямадов, Петр Ян ва Ислам Махачев чемпионар гъахьну.
«Йиз шадваликан ктибтуз гафар дихъурадарзуз. Узу спортдиъ му талитарихьна ва гъалибвал гъадабгъбахьна хайлин рякъ ккадапIунза. Магьа йиз кIваъ айи кьаст йиз кьял’ан идибтIна. КчIихбар аьдати къайдайиинди гъушну. Узхьан, хъана артухъ мумкинвалар улупури, кчIихуз шуйзухьан, хъа фти-вуш манигъвал гъапIнийзуз. Дагъустан, Кавказ, Урусат, магьа ухьуз сабсана чIул гъабхьну», – гъапнийи кчIихбарин кьяляхъ Мягьямад Анкалаевди.
Гъалибвал гъадабгъба-хъди Мягьямед Анкалаев Дагъустандин глава Сергей Меликовди тебрик гъапIну.
«Мягьямед Анкалаев – Дагъустандиан вуйи UFC-йин цIийи чемпион!
Мягьямад, дугъан команда, тренерар ва вари ихь республика му гъалибвалихъди тебрик апIураза.
КчIихбар ккергъну ккуду-кIайиз ихь спортсмен Алекс Перейра магълуб хьуз гъитри, улихь гьудучIвури гъахьну. Дагъустандин спортсменди, чан кьатI’и йивбариинди чаз къаршуди удучIвнайирин аман адабтIуз гъитри, лайикьлуди гъалибвал гъадабгъну.
Мягьямаддин му чIул гъадабгъбахьна вуйи рякъ фукьан гъагъиб гъабхьнуш, варидариз мялум вухьуз. Гьамус ихь региондиз кьюб чемпионвалин чIулар а. Думу вари устадвалин, улихь дивнайи кьастарин, кьувватнан ва гафнан ижмивалин натижа ву.
Дагъустанлуйир магълуб даршлувалин сир фтиъ аш, UFC-йин кIулиъ айидари ухдихъанмина фикрар апIурайивалин гъавриъ аза. Йишв’ина дуфну, аьгъю апIуз вахт ву. Дана Уайтдиз ихь чемпионар фици аьхю шулаш, дурари хътабгъурайи гьава фициб вуш, фицдар хинкIар итIураш, аьгъю гъабхьиш, харжи хьибдар.
Мягьямад, учук дамагъ капIбаз чухсагъул! Ухьу хъана заан гъалибвалар гъадагърувалиин инанмиш вуза», – гъапнийи республикайин главайи чан тебрикнан илтIикIбаъ.
Гъябгъюрайи гьяфтайи итни йигъан йишвну Анкалаев Дагъустандиз гъафну. Думу къаршуламиш апIуз Каспийскдин аэропортдиз варжариинди инсанар уч гъахьнийи.
Мягьямед Анкалаев Шамиль райондин ТIелетIл кIуру гъулаъ бабкан гъахьну. БицIи вахтнаанмина думу чан абйир-бабариз хулан ляхнариъ кюмекчи вуйи. Дурарин хизандиъ хьур велед айи ва варитIан аьхюнур Мягьямед вуйи. Думу 9-пи классдиъ урхурайиган, дугъан адаш кечмиш гъахьнийи, ва бицIи Мягьямеддин гъюнариин вари хизандин гъайгъушнар алахьнийи. Студент вахтари думу греко-римский кчIихбариин машгъул гъахьну. Гьаддилан дугъан спортдин рякъ ккебгънийи.
