Зубайдат Шябанова

Гъябгъюрайи йисан 1-пи январихъанмина хусуси метлеб айи дявдин операцияйиъ иштирак шулайи Дагъустандиан вуйи эскрариз пулсузди реабилитацияйин центрариъ санаторйиринна курортарин жюре сагъламвал мюгькам апIуз мумкинвал гъабхьну. Мидин гьякьнаан Дагъустан Республикайиъ айи Урусатдин социальный фонддин отделениейин пресс-гъуллугънаан мялумат тувну.

 

Хусуси метлеб айи дявдин операцияйин гьарсар иштиракчийиз сагъламвалин курснан чан хусуси программа тартиб апIиди. Фонддин вакилари ветеранариз документар уч апIбаъ ва сагъвалин курс тешкил апIбаъ вари терефариан кюмек тувди. Реабилитацияйин центриз путевка гъадабгъбан бадали, Социальный фонддин, МФЦ-йин региондин отделенйирин идарйириз илтIикIуру, ясана «Госуслуги» порталиъ аьрза бикIуру. Аьрзайихъди сатIиди реабилитация лазим вуйивал ва духтрарин къадагъа адрувал субут апIурайи документар хъади ккунду.

Фонддин пресс-гъуллугънаан къайд гъапIганси, хусуси метлеб айи дявдин операцияйин ветеранари реабилитацияйиз гъягъру ва гьадушв’ан хулаз гъюру рякъяриз удучIву харжарин компенсацияра гъадабгъиди. Думу пул гъадабгъбан бадали, транспортдихъан туву харжарин кьадар улупурайи тялукь кагъзар чарасуз лазим ву.
Мидлан гъайри, Урусатдин Игитариз ва 1-пи группайин инвалидариз реабилитацияйин центрариз сагъвал мюгькам апIуз направление нубатназ дилигди тувру. Му жягьтлувал хусуси метлеб айи дявдин операцияйиъ иштирак гъахьидариз кюмек апIуб ва гъагъи зийнарин кьяляхъ дурарин сагъвал къайдайиз хуб метлеб ади гьяракатнаъ ипнайиб ву.