Зубайдат Шябанова

Гьаму йигъари Табасаран райондин глава Мягьямед Къурбанов ТIивак гъул’ан вуйи хусуси метлеб айи дявдин операцияйин иштиракчи, шубуб Кьягьялвалин орденарин сагьиб Рустам Пировдихъди гюрюшмиш гъахьну.

 

Рустам Пировдин 27 йис ву. Дугъу Новосибирскдин заан военный командный училищейиъ аьгъювалар гъадагъну. Училище ккудубкIбан кьяляхъ Мурманский областдиъ разведка гъабхру батальондиъ гъуллугъ гъабхури гъахьну. Чан подразделениейин дахилнаъди Рустам садпи йигъарихъанмина хусуси метлеб айи дявдин операцияйиъ иштирак шула. 2022-пи йисан августдин вазли дугъаз гъагъи зийнар гъахьну. Санкт-Петербург шагьриъ госпиталиъ зийнар сагъ апIури 3 ваз улдубчIвбан кьяляхъ, думу хъана дявдин юлдшарихьна кьяляхъ гъафну. Дугъан бицIину чве Мягьямед Пировра хусуси метлеб айи дявдин операцияйиъ иштирак шула.

Гьамусяаьт Рустам разведка гъабхру ротайин командир ву. Эскрин игитвализ, мургувализ ва гафниин ижмиди дийигърувализ командованиейи заан кьимат тувна. Думу швнуб-сабан заан наградйириинди лишанлу гъапIну. Дурарин арайиъ Жуковдин кьюб медаль, «Игитвал улупбаз лигну» медаль, «Ватандин улихь лайикьлу хьпаз лигну» 2-пи дережайин медаль-орден, гьацира Кьягьялвалин кьюб орден а. Гьамусяаьт Рустам Пиров шубубпи Кьягьялвалин ордендиз улупурайи къарариин къул дизигна.
Гюрюшдиъ Рустам Пировди хусуси метлеб айи дявдин операцияйиъ иштирак шулайи эскрариз рягьимлувалин кюмек тувбаз райондин главайиз чухсагъул мялум гъапIну ва чан гъуллугънакан, дявдин женгариъ улхьан жергйириъ айи юлдшар-дагъустанлуйирин дирбаш’валикан, ихь эскрарин сарихьанра ккабгъуз даршлу игит рюгьнакан ктибтну.
Мягьямед Къурбановди Рустам Пировдиз, Ватан уьбхбак дугъу баркаллу пай киврайивализ лигну, чухсагъул мялум гъапIну.