Наврузбег Керимов
14-пи мартди Дагъустандин Огни шагьрин кIулиъ айи Замир Гьяжимурадовди, И.А. Агъабалаевдин ччвурнахъ хъайи медицинайин колледждин кIулиъ айидари ва диндин вакилари сатIиди ушв гьибтбан мажлис тешкил гъапIну. Думу серенжемдиъ хусуси метлеб айи дявдин операцияйиъ гъийиху жигьиларин хизанар, диндин вакилар, жюрбежюр тешкилатарин кIулиъ айидар, шагьрин жямяаьтлугъ иштирак гъахьну. Гъирагъдиан теклиф дапIну дуфнайи хялариз ва шагьриъ яшамиш шулайи мусурман чвйириз ва чйириз ушв гьибтуз шартIар, хъайи-хъайибси ужуди албагнайи программара гьязур гъапIнийи.
Сувабнан мярака Замир Гьяжимурадовди ачмиш гъапIнийи. «Гьюрматлу ватанагьлийир, магьа гирами Рамазандин вазра улубкьну. Му вазли ухьу гъидису ушвар, гъапIу гъудгнар ва жара ужудар ляхнар Аллагьди кьабул апIри. Ва гьамддихъди сабси дюн’яйиъ ислягьвал, халкьарин арайиъ мюгькам мясляаьт ади гъузуб ккун апIураза», – гъапнийи шагьрин кIулиъ айири.
Харижи уьлкйириан теклиф дапIну дуфнайи хялари нашидар гъурхнийи ва тупут ипбиинди ифтариз дуфнайидарикан 1 касдиз бицIи гьяждиз (Уьмрайиз) путевка тувнийи.
Думу путевка Дагъ. Огни шагьриъ яшамиш шулайи ва аграрный колледждиъ урхурайи Расул Гьюсейновдиз кьисмат гъабхьну. Расул варидариз таниш жигьил ву. 2023-пи йисан 13-пи июндиъ Дагъ. Огни шагьриъ, серфингдин тахтайиин элеъну, гьюлин лепйириин тамшир апIурайи 13 ва 14 йисан яшариъ айи живанар гьюликк ккахъиган, бахтнаанси дурарин багахь хьади гъахьи Расули живанар дишла сагъ-саламатди штуккан ккадагънийи.
Ихь аьхю айбйирин айту а «Саб ражну гъапIу ужувлан ляхни вари йишварихьанди ччивар деетуру, хъа думу ччиварикан цIийи гъелемар ктучIвуру». Гьаму мажлисдиъ иштирак гъахьи агъзуртIан зиина касарин арайиъ путевка гьаму кIубан бализ ккубкьували айтуйин гьякьлувал субут апIура. Расули гъапIу ужувлан ляхниз варитIан аьхю чухсагъул, Аллагьди терефнаан гъабхьну – бицIи гьяждиз рякъ ачухъ гъапIну. Жигьили путевка адашдиз багъишламиш гъапIну.
Дагъ. Огнийи аьхю субботник кIули гъубшну
15-пи мартдиъ Дагъ. Огни шагьри субботник кIули гъубшну. Дупну ккундуки, Замир Гьяжимурадов шагьрин главади дийигъхъанмина, муниципалитетдиъ гизаф учIруди дийибгънайи зирзибилин месэла гьял гъапIну.
Субботникдиъ шагьрин администрацияйин, сагъламвалин, культурайин идарйирин вакилар, мектебарин коллективар ва жара идарйирин пишекрар иштирак гъахьнийи. Варидари сатIиди шагьрин жямяаьтлугъ йишвар, кючйир, шагьрин вари гъирагъ-бужагъар, Ватандин Аьхю дявдиъ гъийихдарин гьюрматназ дивнайи ядиграр, Украинайиъ чпин жанар фида гъапIу кьягьялариз кивнайи «КIваинди уьбхбан багъ», яшайишдин объектар марцц апIбан ва жара ляхнарра кIули гъухьну.
