Гьюрматлу ватанагьлийир!

Магьа мубарак Рамазандин ваз ихь ул хъмиди аьхирихъна гъафну. Ваз улихьна думу фици аьхю хушниинди тебрик гъапIнуш, гьамус гьаци юкIв сефилди гьапIрира ахьа. Му ваз, уьмрин рякъюъ деету гъалатIариин швумалвал зигуз, Первердигариз ккарагури, Дугъкан ихь гунгьарилан хил алдабгъуб ккун апIуз, ихь дисурайи ушвар ва рягьимлувалин ляхнар кьабул дапIну, жан сагъ, рюгьра марцц апIуз ухьуз мумкинвал туврайи ниъмат ву. Му вазли, вари мусурмнариси, ихь ватанагьлийирира, шагьрар-гъулариъ мистариз уч шули, таравигь-гъудгнар, дюъйир апIури гъахьну, адру-дарудариз, даршлудариз, йитимариз гьарури чаан удукьру рягьимлувалин кюмекар туври, касибвал кайидарин хил бисури, ифтарар тешкил апIури гъахьну. Му мажлисар-серенжемари, ин ша Аллагь, мусурмнарин юкIвар саб апIур, ихь арайиъ чвевалин, багахьлувалин, дин-гъардаш’валин аьлакьйирра мюгькам апIур.
Ихь гъидису ушвар кьабул апIбан шартIарикан саб вуди, гьарсар нуфусдилан улупнайи кьадарнаъди закят уль-фитр – ушварин сеъ тувну, мусурмнарин шубуб машквракан саб вуйи Ид аль-адха – Ураза байрам гъи-закур тебрик апIидихьа.

Гьюрматлу ватанагьлийир, гирами чвйир-чйир! «Табасарандин нурарин» редакцияйин терефнаан учу гьаму улубкьурайи Ушварин машкврахъди учву вари марцци кIваан тебрик апIурача! Гъит ихь гъидису ушвар, гъапIу гъудгнар, гьарсарихъан туву ушварин сеэр, садакьйир, хайирлу ляхнар ва кIван марцци ниятар Аллагьу Тааьлайи кьабул апIри ва Чан рягьимлувалиан ухьуз аьхю савабар дикIри. Гъит гьаму Рамазандин вазлин гирамивалиан ихь дюъйир кьабул дапIну, Аллагьу Тааьлайи ухьуз мюгькам сагъвал, кIван шадвал, хулаз берекет, хизандиз мясляаьт хури, язиъ айидар сагъ-саламатди чпин кюлфетарихьна кьяляхъ гъюри, гъит ихь халкьдин вакилар чпин марцци умударихъ хъуркьри, дюн’яйин ляхнариъра, писвал ккабгъну, дугъривал, гьякьвал ва ислягьвал гъалиб ибшри!