Зубайдат Шябанова
Гъубшу йисан 12-пи октябри чапдиан удубчIву «Табасарандин нурар» газетдиъ Урусатдин «Гележегдиз гам» конкурсдин республикайин дережайин пайнаъ сабпи йишв гъадабгъу Алина Къарахановайикан «Яв ччвур ухьуз хъана ебхьиди» кIул алди, макьала тувнийча. Макьалайин ччвур якьин дюзиб гъабхьну. 2025-пи йисан мартдин 24-диан 28-пи йигъаз «Гележегдиз гам» илимдин форумдин федеральный асас пай Москва шагьриъ кIули гъубшну.
«Гележегдиз гам» форумдиъ гьар йисан агъзрариинди бажаранлу жигьилар ва аьлимар иштирак шула. Гъубшу йисан Урусатдин ва 12 харижи уьлкйириан вуйи ахтармишар гъахру 1148 жигьили душваъ иштирак хьуз путевкйир гъазанмиш гъапIну. Дурарин арайиъ Табасаран райондингимназияйин 11-пи классдиъ урхурайи Алина Къарахановара айи. Форумдиъ финалин натижйириинди Алина сабпи йишван сагьибси, илимдин талитарин абсолютный гъалибчирра гъахьну. Алинайин «Юриспруденция» секцияйиъ «Жини аьзабар: хизандин айитI зулум ва дишагьлийирин ихтиярар» проектдин ляхниз жюрийин вари вакилари заан кьимат тувну. Мидлан гъайри, «Экспертарин фикриинди, варитIан ужуб видео-презентация» номинацияйиъра Алина Къарахановайи сабпи йишв гъазанмиш гъапIну.
Шуран бажаранвализ ва илмариин лихуз аьшкь айивализ заан кьимат туври, форумдин жюрийи Алина Къараханова илимдин аьхю медалиинди лишанлу гъапIну.
Му хъуркьуваларик Алина-йин илимдин ляхнин руководитель, Табасаран райондин гимназияйин директор Элина Шихмягьямедовайинра аьхю пай ка. Дугъу Алинайиз илимдин ляхин бикIуз кюмек апIувалихъди сабси, ахтармишарин гьарсаб этапдиъ Алина дюз рякъюъди гьаъри, заан натижйирихъна ва варитIан аьхю кьимат тувру гъалибвалихъна гъахьну. Миди ухьуз нубатнан ражари аьгъюваларихьна аьшкь айивали ва гъвалахъ бажаранлу регьбер хъайивали заан хъуркьуваларихъна хрувал субут апIура.
Конкурсдин кьяляхъ ич арайиъ гъабхьи сюгьбатнаъ Элина Шихмягьямедовайи къайд гъапIганси, Алинайи ахтармиш’валин ляхнин тема, ихь дагълу дишагьлийирин уьмриъ шулайи гьякьикьи дюшюшар рякъюри, фикриз гъафну. «Дугъриданна, му темайин важиблувал гьисабназ гъадабгъну, учу думу гьякьикьи дюшюшариин, ихтиярарин аспектариин ва халкьарин тажрубайиин биналамиш шули, ахтармиш’валин ляхин гъабхуз дериндиан хъюгъюнча.
Алинайин илимдин ляхнинна жарадарин ляхнарин арайиъ аьхю фаркьвал а. Уьлкейин улихь хьайи вузарин аьлимарикан ибарат вуйи жюрийин вари вакилари дугъан ляхниз заан кьимат тувну. Миди учу гъитIибкIу месэлайин важиблуваликан ва думу гьял апIру рякъяр дагну ккуниваликан кIура.
«Гележегдиз гам» форумдин федеральный этапдиъ иштирак хьувалиинди учуз ич ахтармишарин ляхин улупузси, бажаранлу инсанарихъди, экспертарихъди ва аьлимарин тажрубайихъди таниш хьуз мумкинвал гъабхьунчуз.
Форумдин дахилнаъди гъахьи конференцйирра кIваълан гьадрархрудар гъахьну. Иштиракчйирин заан гьязурлугвали, маракьлу ва сесер тувбан натижайиъ сабпи йишваз удучIвузси ахтармиш’валин ляхнари, дерин дискуссйири илимдин дерин бягьсари илмарин ахтармишарин гьякьикьи атмосфера арайиз гъабхнийи. Хъа жюрийин фикрар, теклифар лапра важиблудар вуйи. Варидарин улихь жюрийи Алинайин ляхин варитIан ужуб, мяналуб ва метлеблубвуйибдикан гъапиган, лапра шад гъахьнийча. Му аьдати нубатнан конкурс ваъ, дугъриданна, гележегдиз гам ву. Диди хъайлин иштиракчйириз ужуб гележегдиз раккнар арццра.
Мюгьлет ккабхъну имиди, узуз «Видеовизитка» онлайн-сесер тувбан номинацияйиъ иштирак гъахьи ватандашариз чухсагъул пуз ккундузуз. Душваъ Табасаран райондианси, республикайиъ ва уьлкейин жара регионари айи аьхю кьадар инсанари сесер туври, Алина улихь гъитну гъахьну. Учу, ихь шуран гъалибвалихъ хъугъри, чпин сесер туву гьарсар касдиз кIул’инди-кIул’инди баркаллагь кIурача. Ичв кюмекну Алинайихьди сабпи йишваз удучIвуз гъитувалилан гъайри, ихь халкьдин сабвалра улупну. Гьацира федеральный дережайиъ иштирак хьуз ихь командайиз кюмек гъапIу РД-йин образованиейинна илимдин министерствойиз чухсагъул мялум апIурача», – гъапну Элина Шихмягьямедовайи.
Алина Къараханова нубатнан ражари тебрик апIури, чан кIван хияларихъ хъуркьуб ккун апIурача. Хъугъай, думу хъуркьди ва ухьуз дугъан ччвур хъана ебхьиди.
