Наргиз Гюлечова

Республикайин муниципалитетарин паркар, жямяаьтлугъ йишвар, хусуси гьяятар уччву апIбан бадали киврайи кюкйир Дагъустандиъ гьясил апIурайидар ву. Мягьячгъалайин багьахь хьайи Ленинкент гъулаъ жямяаьтлугъ йишвариъ кивру кюкйир гьясил апIурайи теплица либхури, 10 йистIан артухъ ву. Кюкйир гьясил апIурайи «Нигмат С» теплицайин мяишат хъанара ужуди артмиш апIбан бадали, сакьюдар йисар улихь гьюкуматдин терефнаан му проектдиз пулин кюмек тувнийи. Гьаддихъанмина мяишатди, йигинди артмиш шули, йислан-йисаз ужудар натижйир улупура.

 

Мялум вуйиганси, Дагъустандиъ жямяаьтлугъ йишвар март-апрель вазарилан башламиш дапIну, кабалгури шулу. Му вазар улукьуз вахт ккимидитIан хъюгъну, «Нигмат С» мяишатдиъ кюкйирин штилар гьязур апIбиин ляхин гъабхури шулу.
Кюкйирин «Нигмат С» мяишатди 2,5 агъзур квадратдин метрин йишв дибисна, ва душваъ, хулан кюкйирси, гьяятариъ киврударра, ихь йишвариз хас дару гьарарра ва гьадарихъди сабси, пальмйирна папаййирра битмиш апIура. Хъа теплицайикк лихурайи инсанари, чпиин али ляхин лап аьхю аьшкьниинди тамам апIури, кIулиз гъабхура.

Йиз фикриан, ругдихъди ляхин апIуз ккуни касдиз му йишв Багъдат ву, фицики ицци ниар хъайи уткан кюкйирин тумар урзури, хъа цIиб вахтналан чпи гъизигу зегьметнан уччвували гьяйран апIурайивал, кIваз лап хуш ляхин ву. Гьаци вуйиб мушваъ лихурайи ЦIумада райондиан вуйи ПатIимат Пахрудиновайира тасдикь апIура.
Чан 73 йисандин уьмриъ дишагьлийи хайлин йишвариъ ляхин дапIна, хъа вушра кюкйирин мяшатдиъ лихувал дугъаз машкварси ву.