Зубайдат Шябанова

Апрелин 18-20-пи йигъари Саратовский областдин Балаково шагьриъ ветеранарин арайиъ грекаринна римдин кчIихбариан Урусатдин Кубокдин талитар кIули гъушну. Талитариъ ихь ватанагьли, Табасаран райондин СиртIич гъул’ан вуйи спортсмен, варихалкьарин дережайин спортдин мастер, дюн’яйин чемпион Эмирбег Мягьямедбегов кIулиъ ади, Дагъустандин командара иштирак гъахьну.

Эмирбегу вари кчIихбар, гьадму гьисабнаан финалиндарра, 10:0 гьисаб ади ккудукIну ва чахъди кчIихбариз удучIву саркьана спортсмендиз саб баллкьан гъазанмиш апIуз мумкинвал тувундар. Натижайиъ дугъу хьубпи ражари Урусатдин Кубок гъазанмиш гъапIну. Эмирбег Мягьямедбеговди нубатнан ражари чан гъагънан категорияйин фунур вушра спортсмендихъди учв кчIихуз гьязурди вуйивал ва уьлкейиъ чаин гъалиб шлу кас адрувал субут гъапIну.
Чан гъалибвал Эмирбег Мягьямедбеговди Ватандин Аьхю дявдин Гъалибвалин 80 йисаз бахш гъапIну.
«Табасарандин нурар» газатдин редакцияйин коллективдин терефнаан Эмирбег Мягьямедбегов нубатнан гъалибвалихъди тебрик апIури, дугъаз мюгькам сагъвал ва гележегдиъ хъана заан хъуркьувалар ва гъалибвалар ккун апIурача.