Наврузбег Керимов
18-пи апрели Дербент шагьриъ Гь.Б. Къазиаьгьмадовдин ччвурнахъ хъайи пишекарвалинна педагогвалин колледждиъ табасаран халкьдин бажаранлу шаир, Урусатдин писателарин Союздин член Шюшеханум Керимовайин юбилейиз бахш вуйи «65-пи хьадукар» кIуру поэзияйин мярака кIули гъубшну.
Му серенжемдиъ Кьибла Да-гъустандиъ яшамиш шулайи шаирар, художникар, шаирин дустар, багахьлуйир уч духьнайи. Мярака колледждин директорин заместитель, филологияйин илмарин кандидат Ширинат КIаручаевайи ачмиш гъапIнийи. «Табасаран гизаф адлу аьлимарин, писателарин, шаирарин, бажаранвал кайи инсанарин ватан ву. Инсандиз, учв наан яшамиш гъахьишра, чав бабкан гъахьи юрдар, багъри касар, табиаьт, яна бицIигандин йисар адау йишвар кIваълан гъягъюрдар. Дурарихьан ярхла айиган, дурар артухъ кIваин ва ккун шулу. Шюшеханум Керимова сумчIуртIан артухъ йисари Белгородский областдиъ яшамиш гъахьнушра, дугъу чан багъри чIалнахьна вуйи маракьлувал, поэзияйихъ юкIв хъайивал чан шиърариъ улупура. Шаири ухьуз чан кIваз хушди вуйибдикан цIарариинди кIура, ихь халкьдин поэзия артмиш апIбак аьхю пай кивра», – гъапнийи Ширинат КIаручаевайи .
Серенжем кIули гъабхурайи табасаран шаир, драматург, Дагъустан Республикайин культурайин лайикьлу гъуллугъчи Эльмира Аьшубеговайи шаирин яратмишариз ужуб кьимат тувнийи.
«Шюшеханум Керимовайи ихь багъри чIална халкьдин культура артмиш апIбак лайикьлу пай киврайиси, дагъустан халкьарин культурайин артмиш’валикра пай киври, жара миллетарин эсерар ихь чIалназ таржума апIура. Дугъу гьацира бицIи яшнан баяр-шубариз вуйи китабар гьязур апIуз чарйир зигура», – къайд гъапIну Э.Аьшурбеговайи.
Мяракайиъ Дербент шагьрин собраниейин депутат, табасаран халкьдин милли культурайин автономияйин регьбер, жямяаьтлугъ кас Айваз Аьлихановра удучIвну гъулхнийи. Дугъу Шюшеханум Керимовайи табасаран чIал артмиш апIбан бадали гъабхурайи ляхникан ктибтнийи, Дербент шагьрин глава Аьгьмед Кьулиевдин терефнан шаириз Гьюрматнан грамота тувнийи ва Табасаран халкьдин милли культурайин автономияйин терефнаанра чухсагъул мялум гъапIнийи.
Мяракайиъ иштирак гъахьи ФатIимат Аьлиева-Мирзаевайи, Айваз Рамазановди, Эльмира Аьшурбеговайи тешкил дапIнайи «Гьевес» клубдин иштиракчйири шаирин творчествойиз ужуб кьимат тувну. Му йигъан тат халкьдин писатель Пейсах Мишиевдина азербажан халкьдин шаир Тахмираз Имамовди Шюшеханум Керимовайин чпин чIалариз илтIикIу шиърарра гъурхнийи.
Шюшеханум Керимова Табасаран райондин Вечрикк гъулаъ бабкан гъахьну. 1984-пи йисан Воронеж шагьриз удучIвну гъушну. 1986-пи йисхъанмина Белгородский областдин Грайворонский райондин Козинка кIуру гъулаъ яшамиш шули, му гъулан мектебдиъ 23 йисан мялимди гъилихну. Мушваъ айи культурайин хулаъра литературайин «Гьевес» кIуру клуб тешкил дапIну, вазли саб ражари чан классарихъди серенжемар гьязур апIури гъахьну. Гьамусяаьтра дугъу, онлайн жюрейиинди либхурайи культурайин хулахъди аьлакьйир уьрхюра ва жюрбежюр машкврариз Расул Гьямзатовдин, чан шиърар гьязур апIури, видео жюрейиинди хътаура.
Ватандихьан ярхла ади гъахьнушра, шаирин багъри чIалнахьна вуйи маракьлувал, табасаран чIалниинди вуйи бикIбарихьна ккунивал гъудубгундар. Дугъан шиърарин 4 китаб удучIвна, 5-пиб гьязур дапIну (бицIи яшнан баяр – шубариз вуйи китаб), чапханайиз тувна.
Шаирин «Уьбхюрхьа чIал» кIуру шиир ихь литература ва культура уьбхюз ва артмиш апIуз кIури абццнайи «Табасаранар» кIуру фонднан гимн ву. Шюшеханум Керимова 4 йисандин арайиъ республикайин «Табасаран нурар» газатдиъ Дербентдинна, Дагъустандин Огни шагьрариъ ва Дербент райондиъ мухбирдира гъилихну.
Поэзияйин мажлиснаъ шагьрин 4-пи ва 11-пи нумрйирин мектебариан вуйи баяр–шубари, гьацира колледждин студентари уч духьнайидар шаирин яратмишарихъди таниш гъапIну.
Поэзияйин мяракайиз Каспий шагьриъ яшамиш шулайи мяълийирин устад Залина Исмяиловара дуфнайи. Дугъу Шюшеханум Керимовайин гафариз вуйи мяъли гъапIнийи.
Уч духьнайидар му йигъан сабсана мяълийихъ хъпехънийи. Думу вахтсузди уьмриан гъушу, эстрадайин бажаранлу артист Фахрутдин Гюлечевди апIури гъахьи «Табасаран» кIуру мяъли вуйи.
– Дугъан планарик йиз «Юрдарин ниар» кIуру китабдик кайи шиърарикан хъана мяълийир апIуб кади гъабхьну. «Ихь мяъли халкьдиз кьабул гъабхьну, Шюшеханум бажи», – гъапнийзуз Фахрутдинди», – ктибтнийи шаири хажалат кади.
Серенжемдин аьхириъ Шюше-ханум Керимовайи мярака тешкил гъапIу Табасаранарин милли культурайин автономияйин вакилариз, колледждин коллективдиз ва вари дуфнайидариз чухсагъул мялум гъапIну.
