Мейлан Нежефов

Апрелин 1-пи йигъан Урусатдиъ армияйиз жигьилар гъахру кампанияйин нубатнан призыв ккебгъну. 18-пи апрелиъ Хив райондиан 2025-пи йисан хьадукран призывдин сабпи десте армияйиз гьаъну.

 

Аьдат вуйиси, жигьилар армияйиз гьауз Хив гъулан Гъалибвалин паркдиз райондин кIулиъ айидар, военный комиссариатдин гъуллугъчйир ва багахьлуйир уч гъахьнийи.

Армияйин жергйириз гъягъюрайи жигьилариз насигьятнан гафар кIури, Хив райондин главайин заместитель Мирзабег Багъичев, Хив ва Агъул районарин военный комиссар Сулейман Гьюсейнов удучIвну гъулхнийи.

Райондин военный комиссариатдиан мялум гъапIганси, цци хьадукран призывдиъ армияйиз Хив райондиан 40 кас гьауз планарик ка. Дурарикан хьур рякъюъ тIаъну. Думу баярин арайиъ айи Мурад Хайирбегов ва Рягьим Ханмирзаев ЧIири гъул’ан ву. Рягьимдин чве Расим хусуси метлеб айи дявдин оперцияйин иштиракчи ву. Чан бали Украинайиъ хусуси метлеб айи дявдин операцияйиъ учв игитси улупурайивалиин разиди, кьюбпи байра ватан уьбхюз гьаърайи дурарин дада Жейран Ханмирзаевайи Рягьимдиз ва дугъахъди хъайи баяриз ягъурлу рякъ ва эскервалин буржи лайикьлу ватанперверарси гъабхуб ккун гъапIну.

2025-пи йисан призывной кампанияйин цIийиваларикан вуди гьюкуматдин мялуматарин дакьатариъ военный учетдиз гъадагъру ватандашариз электрондин къайдайин уведомление хътапIувал гьяракатнаъ убчIвна.