Зубайдат Шябанова

Ватандин Аьхю дявдин йисари Табасаран райондиан ватан уьбхюз 3000-тIан артухъ жилар гъушну, дурарикан кьяляхъ гьацIарра гъафундар. Хайлин эскрар дявдин женгариъ улупу игитвалариз лигну, орденариинди ва медалариинди лишанлу гъапIну.
Дявдин йисари фронтдиз кюмек тувбаан Табасаран район улихь цIарнаъ ади гъабхьну. Гьаци, Табасаран райондин зегьметкешари фронтдиз 10 агъзур тонна дяхин, 2 агъзуртIан артухъ тонна йикк, 250 тонна кIаму ва 190 тонна нис, 96 тонна хьа, 80 агъзур жут гъидкьарикан ва лиарикан табагъ дапIнайи гьязур сурсат, 100 агъзур жут бегьлийир ва 47 агъзур жут атIнар, варж агъзрариинди тонна йимишарна мейвйир хътаъну. Мидлан гъайри, райондин агьалйири уьлкейин оборонайин фондназ 5 миллион манат уч гъапIну.
Гьацира, душмнихьан азад гъапIу гъуларин ва шагьрарин агьалйириз Табасаран районди фронтдин фонднан дахилнаъди колхоздиз кюмек вуди 1944-1945-пи йисари 150-тIан артухъ аьхю малар ва 870 чарва, 100 сил, йицIбариинди гьяйвнар, йицIбариинди тонна дяхин, йимишар ва мейвйир хътаъну.

Райондин хайлин ватандашари Дагъустандин аьтрафариин танкариз ва пияда кьушмариз манигъвал тувру сенгер адатIури, оборона уьбхру йишвар, аэродромар, хайлин вахтна дяви гъабхуз шлу йишвар тикмиш апIбаъ иштирак шули гъахьну.
Гьаму йигъари Табасаран райондин глава Мягьямед Къурбановди райондин жюрбежюр гъулариъ яшамиш шулайи, дявдин йисари далу тефнаъ лихури, гъалибвал багахь апIбак баркаллу пай киври гъахьи 104 касдиз «1941-1945-пи йисарин Ватандин Аьхю дявдин Гъалибвалин 80 йис хьпаз» юбилейин медалар тувуб табшурмиш гъапIну.

Райондин администрацияйин вакилар ва гъуларин поселенйирин главйир сатIиди ветеранарин хулариз гъягъюри, пешкешар багъиш апIури, Ватандин Аьхю дявдин гъалибвалик дурари киву важиблу ролиз баркаллагь мялум гъапIну.
Гьяйифки, Табасаран райондиъ Ватандин Аьхю дявдин иштиракчйир саркьана амдар. Гьаддиз гъи далу терефнаъ лихури гъахьи зегьметкешар гьадму дявдин тарих уьбхюрайи асас шагьидар ву.