Мейлан Нежефов
Гьаму улихьна йигъари Москвайин областдин Домодедово шагьриъ ихь ватанагьли Амир Абачевди улупу гьунарну ухьук варидарик дамагъ капIра. Гьадму шагьрин 9-пи нумрайин мектебдин 6-пи классдиъ урхурайи Амири, Курыжова мягьлайиъ хуларин 9-пи мертебайин унчIв’ан ахърайи шубуд йисаъ айи бицIир жилик куркIуз гъитундар.
БицIи игитрин уьмрикан ктибтуб ккун апIури, узу дугъан адаш Гъадим Абулферзовичдихъди гаф-чIал гъапIнийза.
«Гьарганси, гьаму йигъанра хябяхъган ляхниан хулаз гъюрайза. Йиз телефондиз сикин дарди гъуншйирихьан зенгар гъюрайи. Дурари йиз Амирин дирбаш’валикан ктибтурайи. Амма йишв’ина хъуркьайиз, юкIв варж йишвахьинди гъубшнийиз. Узу кючейиз ва хулаз фици хъуркьнушра, аьгъю гъабхьундарзуз… Вари чпин улариинди гъябкъю гъуншйири узуз ихтилат гъапIнийи. ВуйиштIан, мектебдин кьяляхъ ярар-дустарихъди ич кючейиъ айи тамшир апIру майдандиин рягьятвал гъадабгъурайи Амириз саб фтихъан-вуш хъичIихну унчIв’ан бицIир ирхнайиб гъуни-гъуншйирин гьарйир-чIигъариан мялум гъабхьнийи. Сабдиканра фикир дарапIди, Амир дишла дина гъажаргънийи, хъа дугъахъди – дустарра. Гьаци унчIварин кIанакк бицIир чаина гъюру саягъ дийигъну, ахърайи бицIир хилариина гъидисну ва дугъаз хатIа хьуз гъитундайи. Гьадлин бицIириз сарун вари терефарихъанди кюмек дубхьну, думу дишла ич шагьрин больницайиз гъухнийи. Шюкюр Аллагьдиз, кьюридра сагъди имийи. Гьаз кьюридра кIурава гъапиш, зав’ан гьациб саягъниинди гъюрайи бицIирин гъагъишин варж килойиз барабар шула.
Амир 2012-пи йисан 9-пи июньдиъ бабкан гъахьну. Вари баярси, думура хулаъ кюмекчи, варибдин гъаври айи велед ву. Мектебдиъра заан аьгъювалариз урхура, – ктибтура Гъадимди.– Дугъан тербияйиин ва аьгъювалариин мялимарра разиди ву. Йиз уьмрин юлдаш Маринайихъди веледариз гьарган хулаъ туврайи дарс инсанвал дудрубгуб ва жара касдиз кюмекназ бакар хьуб вуйич. Хъа думу эл-аьдат гьарган ихь халкьдин ифдик кайиб ву. Мидланра савайи, игитар ихь арайиъ шлудар ву, гъапиганси, дугъаз чан улариинди игитар рякъюра. Фицики гъи Амирин абайин юкьур гъардши ва сану гъардшин бали хусуси метлеб айи дявдин операцияйиъ иштирак шула. Хъа вари аьламдиз машгьур духьнайи генерал-лейтенант, Урусатдин Игит ччвур тувнайи Эседуллагь Абачевдин хтул жараси хьуз мумкин вуйинхъа!? Гьадму ич фамилияйин ад, хизандин дарс, чан чи Минессайихьна вуйи ккунивал ва ихь халкьдин арайиъ аьсрариинди тартиб дубхьнайи тербия гьисс апIурайи йиз Амирин кьягьялвалиин фукьан вушра рази вуза. Амирин гьунарлу ляхин ихь республикайин главайи чан ччвурнахъан туву сяътиинди лишанлу гъапIну. Багъри юрдариан язиъ айи ич хизандихьна мициб фикир хьуб гизаф хуш вучуз. Гьарсар абайин юкIв, гьаму йизубси, чан веледарикан разиди хьуб ккун апIураза», – гъапнийи чан улхбан аьхириъ Гъадим Абачевди.
Веледариз гьамциб ватанпервервалин тербия туврайи увуз, Гъадим Абулферзович, ва яв уьмрин юлдшиз аферин. Узу умудлу вуза, Амирин ччвур ихь халкьдиз хъана ебхьиди.
