Зубайдат Шябанова

Гьаму йигъари хусуси метлеб айи дявдин операцияйин иштиракчйирин арайиъ волейболиан гъахьи талитариъ Табасаран райондин сборный командайи сабпи йишв гъазанмиш гъапIну.

 

Талитар Аьхю Гъалибвалин 80 йис хьпаз бахш дапIнайидар вуйи, дурар Мягьячгъалайиъ «Труд» стадиондиин кIули гъушну.
Табасаран райондин командайин хъуркьуваларикан варидариз деебхьна. Вушра, Буйнагъск райондин командайихъди вуйи финалин талитар дурариз гъагъидар гъахьнийи. Талитарин гъалибчйир хьуз ккунди, кьюбиб командйирира, тюнт шули, туп чпин терефнаъ бисбаъра, къаршу командайихьна гатIабхьбаъра хайлин гъалатIар деетнийи. Амма вуйибси дупну ккундуки, иллагьки гьадму финалин талитар гьевескрариз маракьлудар гъахьну.
Табасаран райондин сборный команда муниципалитетдин глава Мягьямед Къурбановди хъуркьувалихъди тебрик гъапIну.

«Улихьнаси ухьу райондиъра Аьхю Гъалибвалин 80 йисаз бахш дапIнайи, волейболин турнир гъубхнийхьа. ИкибаштIан, мицисдар талитариъ сабпи йишв гъадабгъуб ухьуз лап важиблу вухьуз, фицики, мурар аьдати талитар дар. Ухьу му талитариъ Ватандин азадвал бадали женгнаъ гъахьи ва чпин жанар фида гъапIу ихь игит абйирин рюгьяриз икрам апIурахьа ва дурарихьна жвуван гьюрмат улупурахьа. Баяриз гъалибвал тебрик апIури, хъана заан ва цIийи хъуркьувалар ккун апIураза», – гъапну Мягьямед Къурбановди.
Талитариъ республикайин шагьрариан ва районариан 12 команда ва гьацира Карачаево-Черкессияйин сборный командара иштирак гъахьну.