Мейлан Нежефов
«Игит абйирихъ игит худлар» проект давам апIури, гъи Хив райондин Фурдагъ гъулан агьали Малларажаб Мукаиловдин дявдиъра, ислягь уьмриъра ватанпервервалиинди хъапIу уьмрикан ва дугъан худул Маларажаб Мукаиловдин гъуллугънакан ктибтурача.
Малларажаб Керимович Мукаилов 1922-пи йисан 1-пи январи Фурдагъ гъулаъ бабкан гъахьну. Набалугъди имиди нежбервалин ляхнарихьна жалб гъахьи Малларажаб чпин хизандиз кюмек вуди Азербайжандин меркез Баку шагьрин нафтлин буругъариин лихури гъахьну. Хабарсузди ихь Ватандиин фашистар алархьиган, думу 1941-пи йисан 8-пи августди Аьзизбековский райвоенкоматдиан дявдиз гъухну. Малларажабди гъуллугъ КIару гьюлин флотдин 7-пи гьюлерин бригадайин 4-пи батальондиъ ккебгъну. Гьадму йисан ноябрин вазли гъутIубкIу снаряддин тики кубкIну, дугъаз гъагъи зиян гъабхьну. Зиян сагъ хьайизкьан думу Грузияйин Цхалтубо шагьриъ гъахьну. Гьадлин 1942-пи йисан эвелариъ думу Севастополь шагьриъ гъягъюрайи женгариъ иштирак гъахьну. Волгайин дявдин флотилияйиин гъуллугъ апIурайи ужур пулеметчик, думу Сталинград бадали гъахьи женгариъра иштирак гъахьну. Швнур-сар фашистарин терс хуйир гьаргандиз сикин гъапIу Малларажаб хъасин Керчь шагьриз гьау десантдин дахилнаъдира женгариъ гъахьну. Дидхъан Советарин Армияйин кьушмарихъди Румынияйизкьан гъушну. Дугъан дявдин женгариъ улупу игитвализ гьюкуматди лайикьлу кьимат тувна. Малларажаб Мукаилов «Уьру хяд» ва Ватандин дявдин кьюбпи дережайин орденар, «Сталинград уьбхбаз лигну», «Жюрэтлувал улупбаз лигну», «Ватандин Аьхю дявдиъ Германияйиин гъалиб хьпаз лигну» ва юбилейин медаларин сагьиб ву.
1947-пи йисан армияйин жергйириан хъадакну гъафи Малларажаб Керимович сифте Бакуйин нафтлин буругъариин лихури гъузну. 1949-1952-пи йисари думу багъри Фурдгъарин гъулаъ библиотекайиъ лихуру. 1952-пи йислан 1968-пи йисазкьан Бакуйиъ лейтенант Шмитдин ччвурнахъ хъайи тIилар апIру заводдиъ ляхин апIури гъахьну. 1968-пи йисан хъана багъри гъулаз хъадакну гъафну ва «Куштильский» совхоздиъ рабочий вуди лихуз хъюгъну. Жямяаьтдин гъуллугънаъ айи ва чан ляхин жавабдарвалиинди тамам апIурайи Малларажаб гьюрматнан ва чухсагъул мялум апIбан кагъзариинди лишанлу дапIна.
Ватандин Аьхю дявдин кьяляхъ Малларажабди чан уьмур Гьейбат кIуру дишагьлийихъди ккабалгуру. Аку дюн’яйиз ургур велед духну, дурариз бахтлу уьмриз рякъ улупну. 1995-пи йисан 18-пи феврали, 73 йис яшнаъ ади, Малларажаб Мукаилов рягьматдиз гъушну.
Ватандин Аьхю дявдиъ Гъалибвал гъадабгъу игитарикан сар вуйиб гюзет апIури, фагьмиъ ва фикриъ дугъан игитвал уьбхюри, 80 йисандин гъаншариъ багъри гъулан кючйирикан саб кючейиз дугъан ччвур тувну. Думу кючейин хуларин цалик Малларажабдин сурат кайи мармардашдин гъван кебхна. Гьаци эскер аргъаж шулайи наслариз нумунади гъузди.
Малларажаб Мукаиловди чалантина баркаллу хизандин кIулар гъитну. Гъи дугъан веледари ва худлари дирбаш абайин рюгьяр рази ктаури, уьл ипIура. Шубур хтул – Руслан, Денис ва Маларажаб – Урусатди Украинайиъ гъабхурайи хусуси метлеб айи дявдин операцияйиъ иштирак шула.
Маларажаб Зияудинович Мукаилов 1995-пи йисан 30-пи авгъустди Хив райондиъ Фурдагъ гъулаъ бабкан гъахьну. 2012-пи йисан заан хъуркьувалариинди Ургъа гъулан кьялан мектеб ккудубкIбалан кьяляхъ, жигьил Мягьячгъалайиъ промышленно-экономический колледждик урхуз кучIвру. 2016-пи йисан Маларажабди, колледж ккудубкIбан кьяляхъ, Приморский крайдин Фокино шагьриъ чан сад йисандин эскервалин буржи тамам апIуру. Армияйиъ Ватан уьбхбан пише кьабул гъабхьи Маларажабди, Урусатдин Яракьлу кьувватарихъди контракт йибтIну гъуллугъ апIуз хъюгъру. 2020-пи йисан Сирияйиъ гъахьи кчIихбариъ иштирак гъахьну, хъа гъи 2022-пи йисан сабпи йигъланмина Украинайиъ гъябгъюрайи хусуси метлеб айи дявдин операцияйиъ гьунарар улупура. Дугъаз Сирияйин ва хусуси метлеб айи дявдин операцияйиъ иштирак хьпан медалар а.
Гъалибвалин пайдагъ хлиъ ади кьягьял гъюру рякъ адашди ва дадайи улиъ уьбхюра. Дурари бай эвленмиш апIуз планламиш дапIна. Гъит дурарин аку хиялар сяаьтнаъ ахьри.
