Ужур духтри иццурайирин беденси, юкIвра сагъ апIуру, дугъаз духтирси психологра хьуб алабхъуру. Духтирвал апIуб жавабдар ляхин ву, илагьки дишагьлийиз. Хал-хизан айи дишагьлийиз больницайиъ лихувал ва иццурайи касар рази апIувал, йиз фикриан, аьхю гъагъ ву. Му месэлайин гьякьнаан чав фициб фикир апIураш, узу Дербент шагьрин кьялан больницайиъ ляхин апIурайи ФатIимат Сефербеговайихьан гьерхнийза ва чан уьмрикан пуб ккун гъапIнийза.
– Узу Табасаран райондин ТIивак гъулаъ бабкан гъахьунза. Духтирвалин пише гъадабгъуз ккуни кас анжагъ чан кьувватариин инанмиш духьну ккунду, фицики духтриз иццру касдихъан юкIв убгувал, дугъан кIваъ вари ужу шлувалик умуд кивуз гъитувал алабхъура. Узу духтир хьуваликан гьеле мектебдиъ урхури имиди фикрар апIури гъахьунза. Думу гъагъи ляхин вуйиб гьадмуган имиди аьгъяйиз, хъа узу, усалвалиъ кIул идривди, хайлин йисари намуслуди йиз ляхин гъапIунза ва гьамусра давам апIураза.
Дербент шагьрин медучилище ккудубкIну, 1972-пи йислан мина гъийин йигъазкьан Дербент шагьрин кьялан больницайиъ иццру касар кьабул апIру отделениейиъ медсестради лихураза. Йиз уьмрин кеспниин гизаф разира вуза.
Дишагьлийиз уьмриъ гизаф читинваларра алахьуру, амма ФатIимат Сефербеговайин хасиятнан асас лишнар – аьлхъру маш, гаф-чIал апIбан умунвал, инсандихьна гьюрматниинди илтIикIувал ву. «Учу швнуд-сад йисариинди сатIиди ляхин апIурача, ляхниз, гафназ, гъуллугъназ учвсир гъулай кас адаршул. Дугъахъди вари месэл-йир гьял апIуз рягьятди шулу. Дугъу, увухъ хъебехъну, кюмек апIрувалиин улихь ккимиди инанмиш хьуз шулу. Ужур касдихъди ляхин апIувалра инсандиз саб уж’вал ву. Йиз терефнаан ФатIиматдиз жандин сагъ’вал, чан хизандиз ва баяр-шубариз уж’вал ккун апIураза», – гъапнийи, ФатIимат Эдеевнайикан улхури, дугъан гъарашугъ ПатIимат Нигьматовайи.
«ФатIимат Сефербегова учуз нумуна вучуз. Тазади ляхин апIуз дуфнайи жигьил духтрариз дугъу гьарган гафниинди, ляхниинди кюмек апIуру, коллективдиъ фици ляхин дапIну ккундуш улупуру, аьхюдариз гьюрмат, иццурайи касарихъди гаф-чIал апIбакан ва гьацира ужуди ляхин апIбакан кьиматлу мялуматар тувру.
Гизаф пай ужудар ляхнар узу дугъхъан дургъури шулза. Гьаз гъапиш, думу 48 йисандин тажруба айи кас ву», – къайд гъапIнийи жигьил духтир Милана ТIагьировайи.
– Дишагьлийин уьмриъ, дугъу апIурайи вари ляхнариъ хъуркьувалар хьувал дугъан хизандиканра асиллу ву. Узу йиз уьмриин, уьмрин юлдаш Сефербег Сефербегов гъахьивалиин гизаф рази вуза. Учу 1972-пи йисан эвленмиш гъахьунча ва гьадму йисхъан мина шагьриъ дуланмиш шулача. Сефербег Вагьабуллаевич уьмриз гизаф гъулай кас ву. Белки, гьадгъан кюмекниинди узхьан гьамкьан йисари йиз ляхин апIуз гъабхьуншул. Учу кьюрид шубур уткан, ужудар ва хайирлу веледарин – Мягьямеддин, Аьлибеган ва Мадинайин – абйир-бабарра вуча.
Ич баяри кьюриддира Нижний Новгороддиъ милицияйин заан Академия, юридический факультет ккудукIну, гъи Дербент шагьрин полицияйин отделиъ силисчйирди ляхин апIура: Мягьямедди – силисчивалин отделин начальникдин заместителди, Аьлибегу – гьадму отделиъ силисчиди. Мадинайи Мягьячгъалайиъ ДГПУ-йиъ гъурхну, думу педагог ву.
Мягьямеддиз ва дугъан уьмрин юлдаш Аминатдиз кьюр велед а. Сяид – программист ву, шуру Залинайи Дербент шагьрин медучилищейин 1-пи курснаъ урхура.
Аьлибегаз ва дугъан уьмрин юлдаш Эльмирайиз шубур бицIир а. Дурарин шубар Камилайи ва Фаидайи духтирвалин пише дубгьура, бали Вагьабуллагьди гьеле мектебдиъ урхури ами.
Мадинайизна чан уьмрин юлдаш Аьбдулизра аьхю хизан – шубур риш ва сар бай а. Дурарин аьхюнур шуру Дианайи педагогвалин колледж ккудубкIну. Милана дизайнер ву, бали Педретдинди мектебдиъ урхура, хъа бицIину риш Аида гьеле бицIидарин багъдиъ ами. Узуз Аьбдурягьман кIуру сар гудулра азуз, – ктибтнийи ФатIимат Эдеевнайи чан албагу хизандикан.
Заан пишекарвалин дережа айи духтир ФатIимат Сефербеговайиз дишагьлийирин машкврин гъаншариъ жандин сагъ’вал, чан албагу хизандиъ гьаммишан сагъ-саламатвал, чан читин ляхниъ хъана заан хъуркьувалар хьуб ккун апIураза.
