Хив райондин образованиейин цирклиъ цIиб улихьна йисари мектебарин директорарихъди, завучарихъди, мялимарихъди, бицIидарин багъарин заведующйирихъди вуйи совещанйир, методобъединенйир, анжагъ саб доклад дурхну, дидин бегьем анализкьан дарапIди, гьаци гъапIну кIуру саб гафназ улхьан гьадагъну гъитуйи.
Хъа гьамус дурари, къарар адабгъну, ляхниъ сар-сариз алахьурайи читинвалар, удукьурайи заанвалар пай апIуз, гьар гъулан мектебдиъ, бицIидарин багъариъ гъабхурайи чIиви ляхин рябкъюз йишвариина гъягъюри, ахтармиш ва тамаши апIури, ляхнин анализ апIру ва натижйир йивру совещанйир кIули гъахура.
Гьаци, гьаму йигъари вари райондин мектебарин директорарин урхурайидариз тербия тувбан меселйириз лигурайи заместителар ГъуштIларин С. А. Шагьсиновдин ччвурнахъ хъайи мектебдиз хялижв гъахьнийи.
ГъуштIларин мектебдиъ баяр-шубариз тербия тувбан вазифйир кIули гъахурайи М. С. Назарялиевди, сифте гъуларин мектебариан дуфнайи мялимариз хушгелди дапIну, дурар вари пландихъди таниш апIуз саб классдиз сатIи гъапIнийи.
Мялимари, вари классарилан, столоваяйилан, музейилан, библиотекайилан, спортзалилан илдицну, бицI экскурсия гъапIнийи.
КIваин апIуз ккундузуз, 2014-пи йисан 26-пи августдиъ мушваъ 200 урхрударин кьадарназ вуйи цIийи мектеб абццнийи. Гьяйифки, гъи мектебдиъ урхурайидарин кьадар 82-тIан дар, хъа ляхин апIурайи мялимар — 26, техработникар – 11 ву.
(Мектеб абццну ашра, душваъ гъира 21-пи аьсрин вари тIалабар кIулиз адагънадар. Улхьан гьадагънайи ляхнар гизаф ами)
Экскурсия апIбалан кьяляхъ, хялар кью-кьюрди, шу-шубурди бицIи дестйириз пай духьну, ГъуштIларин мялимари киврайи ачухъ дарсариъ деънийи. Улупбан дарсар вари 8-пи мартдиз бахш дапIнайидар вуйи, дурар гьязур гъапIу ва кIули гъуху мялимар 2-пи классдиз дарс киву М.А. Аьлиева, 3-пи классидиз — И.Н.Платова, 4-пи классдиз — Т.Р.Агъабегова, 5-пи классдиз — Р.Г.Рамазанова, 11-пи классдиз — Ф.С.Жалилов вуйи.
Мидланра савайи, урхурайдарин дадйириз, бабариз, чйириз дих дапIну, мектебдин мялимари ва баяр-шубари 8-пи мартдиз гьязур дапIнайи саб сяаьттIан артухъ вахтнан концертра улупнийи.
Сягьна абццри, сифтейин гаф мектебдин директор А. А. Мазовди гъапнийи, дугъан кьяляхъ мектебдиъ урхбан ляхнин месэлйириз лигру завуч Г. М. Назарялиев, мялим тешкилатчи Х. В. Аьлиев, психолог Ф. К. Мирзакеримов, пионер-вожатый Э. Г. Мирзаханова удучIвну гъулхнийи.
Дурари чпин улхбариъ вари Жилиин али чйир, дадйир, бабариз улубкьурайи 8-пи мартдиз тебрикнан гафар гъапнийи. Дада Жилиин варитIан нурлу, аку ва багьа кас вуйиваликан, дугъан веледдихьна вуйи ккунивалкан, кIван манишнан ялавнакан, веледдин тIуб гьадабтIиш, дугъан кIваз шулайи зийникан ктибтнийи. Ва чпин улхбариъ, Максим Горькийдин гафар текрар апIури, ригъ адарш, кюкйир даршлуваликан, шид адарш, къурабат шлуваликан, хъа дишагьли адарш, я шаир, я аьлим, саб гафниинди, мюгьюббат адру кур бахтнакан гъапнийи.
Гъирагъдилан дуфнайи дишагьли мялимариз ва завучариз мектебдин администрацияйин терефнаан кюкйир айи гаран гъабар багъиш гъапIнийи.
Аьхириъ, разивалин ужудар натижйир йивури, райондиан дуфнайи заместителарин куратор М. Г. Садикьовди чухсагъул мялум гъапIнийи.
Шаир, аьлим ва мялим, му гъул`ан вуйи агьали Шихмягьямад Гьямидовдин гафар кIваин апIури, хъа думу гафар таниш дарур ихь арайиъ тек-бирра адаршул. Вушра кIваин апIуз ккундузуз:
Ебхьуз ккундуш хуш-зарафат,
Аьгъю апIуз ич аьдалат,
Улдудугди таниш шилди, жан, масан,
ГъуштIилна гъач хяларихьна.
Му гафар чпин гъулан гимн вуйиб ва учу му гъи дюбхну ккуниваликан субут апIури, ихь халис табасаран халкьдин ачухъ суфра ккипнийчуз.
Гъит, ГъуштIил гъулаз гъяру рякъяр-ражар анжагъ шад мяракйиириз кьисмат ишри. Хъа дурари чпин ад-аьдалат ва гимн чIур дарапIрувалиин узу инанмиш вуза.
Йиз ва вари иштирак гъахьи завучарин терефнаан мектебдин администрацияйиз ва суфра гьязур гъапIу дишагьлийириз чухсагъул мялум апIураза. Чухсагъул ва аферин.
