Аьхиримжи зенг

Табасаран райондиъ

Зубайдат Шябанова

Майдин 24-пи йигъан Табасаран райондин гъуларин 54 мектебдиъ аьхиримжи зенг гъивну. Муниципалитетдин 3-сана мектебдиъ аьхиримжи зенгнахъди аьлакьалу мажлисар сад-кьюд йигъ улихьна гъахьнийи. Райондин образованиейин идарйириъ цци 1208 выпускник деетура. Дурарикан 364 – 11-пи класс ккудубкIрудар, имбудар 9-пи классариъ урхурайидар ву.
Му йигъан Табасаран райондин глава Мягьямед Къурбанов райондин швнуб-саб мектебдиз гъягъюз хъуркьну, ва дугъу мектеб ккудубкIурайидариз гележегдиъ ягъурлу рякъ ва имтигьнариъ хъуркьувалар ккун гъапIну. Мисалназ, Табасаран райондин гимназияйиъ 11-пи классдиъ 26 ва 9-пи классарин 45 выпускникар а. Дурарикан 6 урхурайири мектеб гъизилин медализ ккудубкIура.
«Гирами урхурайидар! Магьа гъи учву мектебдиз аьхиримжи ражари дуфначва. Хайлин йисари учву му йигъаз ккилигури гъахьунчва. Саки учвуз варидариз мектеб кьюбпи хал гъабхьну. Мектебариъ гъадагъу аьгъювалар ичв гележегдин рякъюъ иржми шибритI шул кIури, умуд кивраза. Учвуз вари имтигьнариъ хъуркьувалар ва кIваъ айи мурадарихъ хъуркьувал ккун апIураза», – гъапну Мягьямед Къурбановди райондин выпускникариз.
Дугъу гьацира гьадму саб вахтна учв урхури гъахьи Хючна гъулан 2-пи нумрайин мектебдин ва райондин гимназияйин ляхниз заан кьимат тувну.
«Образованиейин цирклиъ гимназияйи вари республикайин улихь ужудар натижйир улупура. Му мялимарин мюгькамди ккабалгнайи ляхнин ва вафалу зегьметнан натижа ву. Узу гимназияйин вари мялимарин коллективдиз, райондиъси, вари республикайиъра дамагъ апIрусдар ученикар тербияламиш апIбаз чухсагъул мялум апIураза. Мисал вуди вари Урусатдин конкурсдиъ лайикьлуди заан йишв гъадабгъу ва ихь республикайин главайи къаршуламиш гъапIу Алина Къарахановайин натижйирикан кIурхьа. Гимназияйин хъуркьувалариинди образованиейин цирклиан ихь райондин рейтинг лап за шулайивалин шагьидар шулахьа. Гъубшу йисан ухьуз 100 баллиз имтигьнар туву Жигьан Рамазанова айхьуз. Гьаму йисанра ихь выпускникарик миж кивурхьа», – гъапнийи главайи.
Хайлин йисари образова-ниейин цирклиъ гъизигу баркаллу зегьметназ ва гъазанмиш гъапIу хъуркьувалариз лигну, райондин гимназияйин мялимар Лейла Мягьямедова, Севиля Ханягьмедова, Гюльниса Байрамялиева ва 2-пи нумрайин мектебдин мялимар Гьюсейн Гьюсейнов, Феруза Аьбдуллаева ва Низами Мягьямедов Табасаран райондин главайин гьюрматнан грамотйирин сагьибар гъахьну.
Думу йигъан мектебарин гьяятариъ гъахьи серенжемарин аьхириъ варидариз гизаф ужи таниш вуйи зенг аьхиримжи ражари гъивну ва мектебариъ урхурайидари гьязур гъапIу концертарин программйир улупну.
Райондин гимназияйин 11-пи классдин ццийин выпускникарикан чан фикрар ачухъ апIури, ич сюгьбатнаъ Урусат Федерацияйин уьмуми образованиейин гьюрматлу гъуллугъчи, педагогвалин аьхю тажруба айи, республикайин конкурсариз хайлин гъалибчйир ва пешкешнан йишварин сагьибар гьязур гъапIу, райондин аргъаж шулайи наслиз ватанпервер тербия тувбаъ ва образованиейин цирклин артмиш’валиъ аьхю роль уйнамиш апIурайи мялим Севиля Ханягьмедовайи гьамци гъапнийи:
– Гьарсар выпускникди йиз кIваъ кутIубшвуз даршлу шил гъибтну. Дурар гьарсар саб фтииндикIа маракьлу ва тафавутлу шула. Чпин жюрбежюр хасиятариз, дюн’яйиз лигувализ, мумкинвалариз, маракьариз ва удукьувалариз дилигди, дурарин ижми дуствал ади гъабхьну. 11- «1»-пи классдиъ сабвал айи. Узуз дурар вари варитIан ужудар урхурайидар гъахьунзуз.
Учу сатIиди хайлин рякъ ккадапIунча. Дюн’яйиъ шулайи дигиш’валариз дилигди, учу варидари сатIиди варитIан багьалуб ва важиблуб уьбхюз чалашмиш гъахьунча. Думу манишин, сар-сариз кюмекнан хил гьачIабккувал ву. Дурар аьхюдарихьна, Ватандихьна ккунивал ва гьюрмат улупури тербияламиш гъахьну. Ачухъ юкIв ади, инсанвал гьисс апIуз гъудубгъну. Му багьалу савкьатар узухь урхури гъахьидари чпин вари уьмриъ сабпи йишв’ин гъитрувалиин умудлу вуза.
Думу йиз класс вуйи. Варидарихьан чан хусусивалиинди тафавутлу вуйиб ва уьмурлугдиз багъри гъабхьиб! Ягъурлу рякъ ибшричвуз, выпускникар!
Вари выпускникарин терефнаан мани гафар гъи вари республикайиз машгьур духьнайи выпускница Алина Къарахановайи гъапну:
– Узу магьа цци мектеб ккудубкIунза. Гъи, 27-пи майди, математикайиан ЕГЭ тувунча. Гъит вари выпускникариз, имтигьнариан ужудар натижйир гъадагъну, чпин кIваъ айи вузарик урхуз кучIвру йигъар рякъри. Дюзди гъапиш, узуз Москва вая Санкт-Петербург шагьрариъ гьюкуматдин муниципальный идара апIру университетдик урхуз кучIвуз ккундузуз. ИкибаштIан, думу имтигьнарин натижйирилан асиллу ву.
Гъи узуз айи аьгъювалар вари мектебди тувдар вузуз. Мектеб йиз кьюбпи хал гъабхьну. Узу урхури гъахьи гимназияйин директор Элина Атлухановна кIулиъ ади, вари мялимарин коллективдиз баркаллагь пуз ккундузуз. Гимназияйин гьарсар мялим заан тярифназ ва гьюрматнан гафариз лайикьлу ву.
Мектебди йиз уьмриъ аьхю роль уйнамиш гъапIну. Сабпи классдиъ урхури имиди, йиз сарпи мялим Мафият Мирзаевнайи узуз проектар гьязур апIуз, кьюбпи классдиъ дурар конкурсариъ иштирак хьуз улупну. Гьаддихъанмина саки гьар йисан, республикайиъси, Урусатдин конкурсариъра иштирак шули, гъалибвалин ва пешкешнан йишвар гъадагъури гъахьунза. Му сар йиз ваъ, узуз дарсар киву мялимарин гъалибвалра ву.
Вари выпускникарин терефнаан мялимариз баркаллагь кIураза. Учву учухъ гъизигу зегьмет сабдихьдира тевуз шлуб дар. Гъит учвуз гележегдиъ ужудар ученикар, хизандиъ хушбахтвал, жандин сагъвал ибшри!

Дагъ. Огни шагьриъ

Наврузбег Керимов

Дагъустандин Огни шагьриъ Урусатдин Игит Исрафил Мягьямедовдин ччвурнахъ хъайи 4-пи нумрайин кьялан мектебдиъ майдин 24-ди выпускникариз аьхиримжи зенг йивбан серенжем кIули гъубшну. Пайдгъарихъди, шарарихъди дабалгнайи мектебдин гьяятдиз урхурайидар, мялимар, урхурайидарин абйир-бабар, хялар ва шагьрин глава Замир Гьяжимурадов, УO-йин начальник Людмила Насурова, Дагъустандин Огни шагьрин депутатарин собраниейин председатель Насрутдин Бабаев дуфнайи. 11-пи ва 9-пи классарин руководителар кIули ади, гъюнариин уьру лентйир али, сабпи классдиъ урхурайи бицIидарин хилар дидисну, 138 выпускник мяракайиз гъафнийи. Дурарикан 36 – 11-пи классдиан, хъа 102 выпускник 9-пи классдиан вуйи.
Мярака мектебдин директор Расим Мирзоевди ачмиш гъапIнийи. Дугъу, уч духьнайидар му шадлугънан йигъахъди тебрик апIури, гъапнийи: «Учву аьхю уьмрин рякъюъ учIврачва, ичв гьарсарин хъуркьувалар, ичв аьгъювалар ва тербия мялдимдинра хъуркьувал ву. Гележегдиъ ичв абйир-бабарра, мялимарра шад апIуз чалашмиш йихьай, наан гъахьишра, учвуз тербия, аьгъювалар туву, учву ужувлан рякъюъ ау инсанар кIваълан магьаанай».
Хъасин гаф Дагъустандин Огни шагьрин глава Замир Гьяжимурадовдиз тувнийи. «Гьюрматлу выпускникар, ичв улихь ярхи уьмрин рякъ хьа. Думу рякъ фициб шулуш, учв-лан асиллу ву. Мялимари учвуз заан ерийин аьгъювалар, ужуб тербия тувнайивалин шаклу дарза. Гьаз гъапиш «Урусатдин Игит» ччвур тувнайи Исрафил Мягьямедов, дугъахъди сабси гъурху ва учвуз чпин суратар рякъюрайи 5 Кьягьялвалин ордендин сагьибар гьаму мектебдиъ урхури гъахьидар ву. Ичв уьмриъ гьарган шаду йигъар хьуб, улихь хьайи имтигьнар ужудар кьиматариз тувуб ккун апIураза», – гъапнийи Замир Гьяжимурадовди.
Мектебдин выпускникариз насигьятнан гафар Дагъ.Огни шагьрин образованиейин управлениейин кIулиъ айи Людмила Насуровайира гъапнийи.
Шадвалин мяракайиъ мектебдиъ урхурайидари мяълийир, шиърар гъурхнийи, ялхъвнар гъапIнийи, мялимари аьхиримжи урхбан йисандин натижйирикан, урхурайидарин хъуркьуваларикан гъапнийи. Заан аьгъювалар гъадагъбаъ тафавутлу гъахьи саб жерге урхурайидариз мектебдин руководствойин терефнаан грамотйир тувнийи.

 

Дербент шагьриъ

Цци саб жерге кьялан мектебариъси, Дербент шагьрин 8-пи нумрайин мектебдиъра аьхиримжи зенг 24-пи майди гъивнийи. Цци душваъ 11-пи класс – 10 касди, хъа 9-пи класс 65 касди ккудукIну. Гьадрарин арайиъ 11-пи классдиан 4 кас медалистар ва 9-пи классдиан 6 кас отличникар ву. Выпускникарин шадвалин серенжем тебрик апIуз гьаму мектебдиъ гъурху, гьамусяаьт Дербент шагьрин главайин вазифйир тамам апIурайи Ханлар Пашабегов, Дербент шагьрин УO-йин начальник Чимназ Аьлиева, хъана жара хялар гъафнийи.
Мектебдин директор Радик Аьлибеговди, дуфнайи хялари выпускникар му шаду йигъахъди тебрик апIури, дурарикан имбудариз нумуна шлу инсанар хьуб, аьгъюваларин заан кIакIариз удучIвуб, наан гъахьишра, гележег бадали зегьмет гъизигу мялимар кIваълан гьадрауб, ЕГЭ тувбаъ ва гележегдиъ заан хъуркьувалар гъадабгъуб ккун гъапIнийи.