Наргиз Гюлечова
Урусатдиъ саки гьар йисан, 1-пи июлихъан башламиш дапIну, коммунальный гъуллугъарихъан туврайи кьиматар артухъ апIуб аьдат дубхьна. Гьамдихъди аьлакьалу вуди, улихьна йигъари республикайин энергетикайинна тарифарин министр Марат Шихалиев журналистарихъди гюрюшмиш гъахьну.
Пресс-конференцияйиъ министри гъапиганси, Дагъустан, СКФО-йиъси, гьятта Урусатдин регионарин арайиъра коммунальный гъуллугъарихъан варитIан асккан кьиматар туврайи регион ву.
За гъапIу тарифарин гьякьнаан ва тарифар тартиб апIбан кампанияйиъди гъубху ляхнин гьякьнаан Марат Шихялиевди мидиз улихьна йисаритIан цци яркьуди гъапну. Дугъан гафариинди, министерствойин тарифарихъди вуйи ляхин гъабхурайи отдели 1297 жюрейин тарифар тяйин гъапIну. Гьадрарикан 277 тариф газран, 796 электроэнергияйин, 195 штун ва канализацияйин, ва 46 хулариз манишин тувбахъди аьлакьалудар ву.
«Гьаму йисан 1-пи июлихъантина республикайиъ агьалйирихьна рубкьурайи 1 кубометрин газрахъан туврайи гьякъи 15,8% за шула. Янаки гъийин йигъаз ухьу газрахъан 7,09 манат тувраш, 1-пи июлихъантина 8,21 манат тувди. Электроэнергияйин кьимат 12,6% за шула, ва 1 кВт акврахъан 3,94 манат тувди. Гьамусдизкьан дидин кьадар 3,51 манат вуйи.
Штун ва канализацияйин гъуллугъарин гьякьнаан улхуруш, дурар жюрбежюр тешкилатари гьуркIра. Гьаддиз республикайин жа-жара муниципалитетариъ тарифдин кьадаррра жа-жараб хьибди.
Мисал вуди Мягьячгъала шагьур гъадабгъурхьа. Мушваъ гъийин йигъаз 1 кубометрин штухъан туврайи гьякъи 11,9 манат вуйиш, 1-пи июлихъантина 16,1 манат хьибди. Гьаци канализацияйин кьиматарра… Янаки тарифдин кьадар 34,5% за шула.
1-пи июлихъан дигиш шулайи тарифарин гьякьнаан артухъ мялуматар minenergord.e-dag.ru/activity/8099 сайтдиан гъадагъуз гьаруриз мукинвал а», — аьлава гъапIну министри.
Коммунальный гъуллугъарихъан туврайи гьякъи за шулайивалин гьякьнаан инсанари чпин наразивал улупура. Каспийск шагьрин агьали Сиясат Рамазановайи гъапиганси, агьалйириз чпин коммунальный игьтияжар гьуркIуз лап читинди алабхъура, фицики республикайиъ туврайи маважибдин кьадар лап цIиб ву. Саб маважиб вая пенсия гъадабгъури яшамиш шулайи касариз уьмур хъапIуз лап гъагъиди ву, вари багьа дубхьна. Гъафи пулин шубуб пайнакан саб пай дишлади коммунальный гъуллугъарихъан тувну ккунду. Дарш бурж арайиз гъюру, думу ктипуз хъанара гъагъиди алабхъуру.
«Ишлетмиш гъапIубдихъан гьякъи тувуз гьяйиф хьибдайи, эгер гьадму коммунальный гъуллугъарин ери ужуб вуйиш. Кми-кмиди аквар ктIушвури, гъюрайи убхъру шид лазим вуйи ерийинуб даруган, гьаз, фу бадали дурарихъан заан кьимат тувру? Кьиматар за апIру вахтна гьаз гьамдикан фикир апIурадар?» – кIура, наразивал улупури, яшлу дишагьлийи.
ИкибаштIан, му касра дюз ву. Хъа вушра…
