Гюльнара Мягьямедова

28-пи июнди Дагъустандиъ жигьиларин йигъахъди аьлакьалу хьадан машквар къайд апIиди. Думу йигъаз вари региондиан агъзрариинди бажаранлу ва дирбаш жигьилар ккилигура. Планламиш дапIнайи серенжемар Мягьячгъалайиъ, СтIал Сулеймандин ччвурнахъ хъайи багъдихъ гъахиди. Дина уч гъахьи гьарсар жигьилиз чан юкIв зигру тамши рябкъиди.

Серенжем Дагъустан Респуб-ликайин жигьиларин ляхнариз лигру министерствойи, Мягьячгъала шагьрин администрацияйи, Жигьиларин ляхнариз лигру федеральный агентствойи тешкил дапIнайиб ву. Гьаму йисандин машквар, ватанпервервалиин, артмиш’валиин ва ужудар ляхнариин машгъул духьнайи жигьилар сатIи апIури, «Аьгъю апIин. Ккун апIин. Дамагъ апIин. Артухъ апIин» лишниккди гъябгъиди.
Серенжемарин программайиъ стритболиан (кючейиъ уйнамиш апIру баскетболиан) чемпионат, дронарин талитар а, гьацира машквран иштиракчйирихьан Ватандин Аьхю дявдиъ гъалибвал гъадабгъну 80 йис тамам хьпаз бахш дапIнайи арт-объектариз лигуз хьибди.
Спортдин талитарилан савайи жигьиларихьан яратмишарин устадвалин дарсариъ иштирак хьуз, шиклар йивру зонйирихъ шиклар йивуз, жюрбежюр конкурсариъ иштирак шули, пешкешар гъадагъуз хьибди. Программайиъ Дагъустандин эстрадайин машгьур артистарира иштираквал апIиди.
Машквран тешкилатчйири юкIв хъайидариз варидариз серенжемариъ иштирак хьуз теклиф апIура.