Цци табасаран шаир Шюшеханум Керимова бабкан духьну 60 йис шула. Дугъу, поэзияйин хусуси жилгъайиъди гъягъюри, табасаран литература лирикайин иччи гьиссариинди, цIийи темйириинди девлетлу апIура.
Шюшеханум Керимова 1960-пи йисан 19-пи мартдиъ Табасаран райондин Вечрикк гъулаъ бабкан гъахьну. 1977-пи йисан, Курккарин кьялан мектебдин 9-пи класс ккудубкIну, дугъу Буйнагъск шагьрин педучилищейиъ урхуз хъюгъру. 1981-пи йисан урхуб ккудубкIу Шюшеханум Керимова багъри райондин мектебариъ ккергъбан классариз дарсар кивру мялимди гъилихну.
Шаирин мектебдиъ урхури гъахьи вахтарихъан мина дикIурайи шиърар «Табасарандин нурар» газатдиъ, «Дагъустан дишагьли», «Литературайин Табасаран» журналариъ, табасаран поэзияйин антологияйиъ, 9-пи классдиз вуйи китабдиъ чап дапIна.
1984-пи йисхъан мина Воронеж шагьриъ, хъасин Белгородский областдин Грайворонский райондин Козинка кIуру гъулаъ яшамиш шули гъахьи Шюшеханум Керимовайи мушван кьялан мектебдиъра мялимвалин пише давам апIуру. Гьацира 1991-пи йисан дугъу Воронеж шагьрин гьюкуматдин университетдин тарихнан факультет ккудубкIну.
Шюшеханум Керимовайин шиърар Белгородский областдин шаирар Евгений Дубравныйди ва Жанна Бондаренкойи урус чIалназ таржума гъапIну. Дурар «Белгороддин хабрар», «Багъри юрд» кIуру газатариъ, «Чирагъ» журналиъ ва Е.Дубравныйдин «Поводыри души» кIуру шиърарин гъварчнаъ чап дапIна.
Шаирин «Шубуб цIаблин укI» кIуру сабпи шиърарин гъварч 2010-пи йисан, «КкудудубкIру мяъли» кIуру шиърарин кьюбпи гъварч 2011-пи йисан чапдиан удучIвну. Уьмрин гизаф йисар баяр-шубариз тербия тувбаз бахш гъапIу Шюшеханум Керимовайи 2019-пи йисан удубчIву чан «Бахтлу бицIивахт» кIуру китаб аргъаж шулайи наслиз бахш гъапIну.
«Багъри юрдарихьан ярхлариъ яшамиш шулайи вахтна, фикрариъди гьарган жвуван халкьдихъди шули, йиз поэзияйин хусуси рякъ давам апIури гъахьунза. Гьацира узуз гизаф кьабул вуйи ва ккуни урус шаирарин шиърарра ихь чIалназ таржума гъапIунза», – кIура Шюшеханум Керимовайи.
2015-пи йисан ноябрин вазлихъан 2019-пи йисан август вазлин аьхиризкьан шаир республикайин «Табасарандин нурар» газатдин мухбирдира гъилихну.
Шюшеханум Керимовайин шиърар азербайжан чIалназра таржума дапIна, хъа 2018-пи йисан дурар «Xazan» кIуру журналиъ чап гъапIну. 2020-пи йисан Мягьячгъалайин китабарин чапханайиъ шаирин «Юрдарин ниар» кIуру шиърарин гъварч чапдиан удубчIвиди.
«Табасарандин нурар» газатдин редакцияйин коллективди Шюшеханум Керимова кIваантIан юбилейихъди тебрик апIури, дугъаз яратмиш’валин рякъюъ заан хъуркьувалар ккун апIура. Гъит яв мухриан гъюрайи ккудудубкIру мяълийин гьевес йигълан-йигъаз гужал ибшри!
