Хив райондин ЧIири гъулан мистан улихь 20-пи июнди нубатнан ражари мавлид кIули гъубшну. Мажлис тешкил гъапIур ва кIули гъубхур гъулан имам Абубакар Нурмягьямадов вуйи. Дугъу хайирлу мярака гъирагъдилан дуфнайи хялариз ва гъуландариз му мажлисдиъ иштирак хьпан чухсагъул пувалилан ккебгънийи. Хъасин Дагъустандин исламдин университетдиъ урхурайи Мугьяммад Мирзахановди Кьур’андиан гирами аятар гъурхнийи.
Мажлиснаъ райондин имамарин Советдин председатель Шябан-Гьяжи Салигьов, ЧIири ва Мажвгул гъуларин кIулиъ айи Мейлан Нежефов, муфтиятдин мярифатнан отделин кIулиъ айи Исмяил Зайнудинов, Мажвгларин гъулан имам Ислам Прачев удучIвну гъулхнийи. Чпин улхбариъ дурари, диндин китабариан, чпин уьмрин тажрубайиан маракьлу далилар хури, уч духьнайи гъулан агьалйириз хизандиъ албагну яшамиш хьуваликан, кюлфетарин чиб-чпихъди духьну ккуни аьлакьйин рафтарикан ктибтнийи.
Иштиракчйириз мажлисдиз гъюруган туву билетариан удучIвурайи пешкешари серенжем хъана уткан гъапIнийи. Аьхириъ уч духьнайидари сабхилди Палестинайиъ айи мусурман чвйир-чйирихъан, Украинайиъ гъябгъюрайи хусуси метлеб айи дявдин операцияйиъ иштирак шулайи кьягьяларихъан, дурар сагъ-саламатди чпин хизанарихьна гъюб ккун апIури, дюаь гъапIнийи.
Берекетнан ва хайирлу мажлис ЧIири гъулан агьалйириз гизаф кьабул гъабхьнийи. Дидин гьякьнаан чан фикрар ич газатдиз яшлу динагьли Агъабег Нурмягьямадовди ачмиш гъапIнийи. Думу цци Рамазандин взли Хив райондиъ тешкил гъапIу мажлисдиъ чан бализ удубчIву Уьмрайиз вуйи путевкайихъди Меккайиз душну, кьяляхъ дуфнайир ву.
«Гъийин заманайиъ архаинвал адруган, жигьилариз ва аргъаж шулайи наслариз мицистар мажлисар кIули гъахуб гизаф ужуб ва гьевес ачухъ апIру ляхин вуди рябкъюразуз. Йиз вари уьмур гьаму гъулаъ гьапIунза. Гьамусси дарди, думуган аьхюр-бицIир гюзет айи апIувал, кюмекназ бакар хьувал, сар-сарихьна хатир-гьюрмат айи. Гьациб эл-аьдатнан ялав гьисс дапIнайи ва диндин илмар аьгъю дапIнайи аьлимарихьан гьамцдар ачухъ мажлисариъ дарсар гъадагъуб гъийин жигьиларикан тIалаб апIураза. Ич гъулан жигьилариз саб жюрейин аьгъювалар адру, амма диндин фунуб вушра суалназ жаваб тувру агьларихьан ярхла хьуб васият вуйиз. Узура цIиб улихьна марцци ругариина душну гъафунза. Жвуван динагьлийирихъанди юкIв убгуб, дурариз жан гъурбан апIуб цIийикIултIан гъянаъ убчIвнайиз. Гъит ухьу гьарган Аллагь кIваин али агьларикан ишри», – гъапнийи, марцци гьиссари улар кьяши апIури, Агъабег халуйи.
